[retour à un affichage normal]

Mazarinade n° B_15_1

Image de la page

Anonyme [1652], LE MANIFESTE DV CARDINAL MAZARIN, PRESENTÉ AV ROY par luy mesme à son départ de Ponthoise. , françaisRéférence RIM : M0_2391. Cote locale : B_15_1.

aux discours qu’ils sement par tout, & semblables à
celles de tous les Siecles passez, encore que toutes choses
se changent ; ce n’est toutesfois que de nom & de
visage, la mesme substance demeure : il n’y a que les
accidens qui perissent. On se plaint tousiours que
l’Estat est mal gouuerné ; On se plaint des honneurs
& du pouuoir que les Rois donnent à leurs principaux
Ministres, desquels les seruices ne sont pour rien
contez, & quoy qu’il semble que l’effort de leurs
plaintes & de leurs calomnies poincte particulierement
contre eux ; C’est le plus souuent vn piege que
l’on tend pour surprendre le Prince : Cette coustume
estant pratiquée de ne médire iamais de son Roy, ny
de luy faire la guerre ouuertement & directement,
mais on le fait sous le nom emprunté de ses principaux
Ministres : Aussi est-ce la raison plus considerable,
& pour laquelle les voyes defait contre ceux qui
sont en faueur auprés des Monarques & des Rois, sont
qualifiez du crime de leze Majesté, durant que sous
l’ombre du seruiteur, on en veut communement aux
Maistres. L’Histoire Romaine & celle de France nous
en fournissent plusieurs exemples.
 
Nimphidius estant la seconde personne en l’Estat
Romain, auprés de l’Empereur Galba, assembla tous
les Chefs de la milice Romaine, leur faisant entendre
combien que Galba, quant à sa personne, fut vn bon
Prince & tres-moderé, que toutesfois il ne se gouuernoit
pas par luy-mesme ; ains se laissoit mener à Iunius
& à Lacon qui gastoient & broüilloient tout,