[retour à un affichage normal]

Mazarinade n° B_17_2

Image de la page

Anonyme [1652], LE FRANC BOVRGEOIS DE PARIS, Monstrant les veritables causes & marques de la destruction de la ville de Paris. Et les deuoirs du Magistrat & de tous les bons Citoyens pour y remedier. , françaisRéférence RIM : M0_1408. Cote locale : B_17_2.

de faire auec beaucoup plus de frais &
de perte de temps, puis que se rendans assidus
dans lesdits Bureaux, & s’aquitans fidellement &
diligemment de la mouture des blez, on leur y
baillera sans contredit, non seulement les bleds
de ceux qui les indiqueront, mais aussi d’autres
au prix & conditions dont ils conuiendront auec
ledit Entrepreneur.
 
De mesme, il n’a iamais esté si necessaire ny le
temps si opportun pour establir vn reuenu fixe
pour l’entretien des pauures mendians dans Paris,
que maintenant que le nombre en estant infini,
vn chacun souhaite auec passion d’estre deliuré
de l’importunité que l’on en reçoit, à cause de
quoy il n’y a personne qui ne soit raui de contribuer
pour ce sujet, cela se peut neantmoins faire
sans venir à aucune imposition par les moyens
qu’en suggere vn projet d’Edict qui se publie
pour ce sujet, qui ne consistent qu’en simples
premices & reconnoissances enuers Dieu, destinées
par le droit diuin & humain aux choses pies,
en ordonnant cependant pour y subuenir, vne
queste pour vne fois, de bleds sur les bourgeois
& habitans de la ville, qui en ont plus qu’il ne
leur en faut pour leur prouision, & d’argent sur
les autres, au moyen de quoy, & d’autres expediens
non moins doux & fauorables que l’on peut
trouuer : certaines personnes poussées d’vn veritable