[retour à un affichage normal]

Mazarinade n° B_10_29

Image de la page

Anonyme [[s. d.]], LE FLEAV DE L’ESPRIT DE DIEV, SVR LES MINISTRES à deux Cœurs, à deux Maistres, & à deux Visages. "Le Seigneur veut que l’hypocrisie de ceux qui se glorifient en luy, pendant qu’ils le nient par des actions publiques, soit franchement reprise & hautement condamnées par les veritables Euangelistes de sa parole eternelle." Esaye 48. 58. & 66. , français, latinRéférence RIM : M0_1399. Cote locale : B_10_29.

d’Ecclesiastiques, d’estre de bonne vie, d’estre
tres sçauans, d’auoir l’esprit détaché des
biens & des honneurs de la terre, & de ne vous
occuper qu’à catechiser, & qu’à prescher la parole
de l’Euangile ? Nul seruiteur, dit Iesus-Christ
parlant aux Pharisiens, ne sçauroit seruir
à deux Maistres, principalement quand les commandemens
de l’vn sont tous contraires aux commandemens
de l’autre : c’est pourquoy vous ne
sçauriez parfaitement bien obeyr aux volontez
de Dieu, & bien obeyr aux volontez d’vne ambition
si prodigieuse que la vostre.
 
Dieu en parlant a vous par la bouche de son
Prophete Osée, preuoyant bien la vie que vous
deuiez faire, ne dit-il pas qu’il vous chassera de
sa sacrificature ; puisque vous auez mesprisé de
sçauoir ce que vous estiez obligez d’apprendre.
Et sainct Paul ne veut-il pas que l’Euesque soit
irreprehensible, propre à enseigner, non conuoiteux
du bien, ayant le secret de la Foy en pure
conscience, se conformant en cela aux Ordonnances
Canoniques : Ne doiuent-ils pas suir
l’ignorance comme la peste ; puis qu’elle est, selon
sainct Isidore, la mere nourrice de toutes les
erreurs des hommes. Sainct Hierôme dit que
l’Office du Prestre consiste, non seulement à enseigner
la parole de Dieu ; mais aussi à refuter &
à contredire tous les sentimens des Heretiques,
ce qui leur est impossible de pouuoir faire, s’ils
ne sont extrémement versez en Philosophie & en