[retour à un affichage normal]

Mazarinade n° B_11_17

Image de la page

Anonyme [[s. d.]], LE FLAMBEAV D’ESTAT, AVEC LEQVEL TOVS LES PEVPLES DE FRANCE peuuent voir comme ils sont obligez de s’vnir pour l’execution de l’Arrest du 29. Decembre 1651. & de l’Arrest du 23. Iuillet 1652. donnez en Parlement contre Mazarin, toutes les Chambres assemblées. OV L’ON VERRA, I. Que les Arrests d’vn si Auguste Parlement que celuy de Paris doiuent estre inuiolables; principalement quand ils sont donnez pour deliurer l’Estat de la prodigieuse tyrannie où il est. II. Qu’il y va de la gloire de Dieu, de l’honneur du Roy, du salut de la Couronne, du repos public, & du bien vniuersel de tous les peuples de France. III. Qu’il n’est point de François qui ne soit veritablement obligé de respondre vn iour deuant Dieu, de toutes les voleries, meurtres, violences incendies & sacrileges que Mazarin & ses complices font & feront de toutes parts, si on ne les en empesche pas, le pouuant faire. IV. Qu’il n’y a rien de si facile que d’en venir à bout par vn soûleuement general, puis que tous les autres moyens nous ont manqué. V. Et qu’il n’est point de peuple qui n’ait droit de se faire iustice soy-mesmes, quand on refuse de la luy faire. , françaisRéférence RIM : M0_1397. Cote locale : B_11_17.

puissamment à vos interests, puis que vos interests
sont les leurs, & que les leurs son les vostres.
Et certes, sans cette commune vnion il
n’y a point de salut pour elles, enfin tel sera vostre
sort, tel doit estre leur destinée.
 
Courage mes chers amis vous n’auez plus
rien à craindre, suffit, Dieu, & Messieurs les
Princes, se sont declarez pour vous contre toute
sorte de tyrannies. Qu’attendez-vous donc dauantage
à faire ce que vous deuez, puis qu’ils
ont fait ce qu’ils sembloient estre obligez de
faire ? L’vn vous donnera mille fõis plus de forces
qu’il ne vous en faudra, & les autres éclairez
de son sainct Esprit, vous seruiront d’vne merueilleuse
conduite.
Mais apres m’auoir demandé si ce sousleuement
est iuste, me demanderez-vous encore de
plus s’il est fort facile ? En respondant à cette lasche
question, ie vous diray qu’il est tellement
facile que cette facilité ne dépend que de vostre
pure & bonne volonté, & que si vous le desirez,
il n’y a rien au monde de si facile. La volonté est
vne faculté de l’ame raisonnable, en vertu de laquelle
l’homme se porte à faire ce qu’il desire,
selon l’opinion du Prince de la secte peripatetique.
Il est vray que cette volonté a vn tel ascendant
sur nous, qu’il nous est tout à fait impossible
de resister en aucune façon à ce qu’elle desire.