[retour à un affichage normal]

Mazarinade n° A_4_15

Image de la page

Nicolaï, Antoine [?] [1649], HARANGVE FAITE A MONSIEVR LE DVC D’ORLEANS, PAR MONSIEVR NICOLAI PREMIER PRESIDENT EN la Chambre des Comptes. , françaisRéférence RIM : M0_1576. Cote locale : A_4_15.

HARANGVE
FAITE A MONSIEVR LE DVC
d’Orleans, par Monsieur le President
Nicolai, Premier President en la
Chambre des Comptes.
MONSIEVR,
La ioye que cette Compagnie reçoit de vostre
personne, se void beaucoup diminuée lors qu’elle
vient à ietter les yeux sur le suiet qui vous y amene, & que
l’on se sert d’vne voye si extraordinaire & si frequente, qu’il
semble que l’on vueille oster à cette Compagnie toutes les
marques d’honneur qui luy ont esté donnees par nos Roys :
On nous ferme la bouche : On nous oste la parole lors qu’elle
seroit plus necessaire pour le seruice du Roy : On nous traitte
de mesme que si nous n’auions pas assez de suffisance pour
connoistre ce qui est vtile à l’Estat, & si nous manquions de fidelité
& d’affection pour contribuer à la gloire & au seruice du
Roy : On nous oste la liberté de parler & de dire nos sentimens.
C’est renuerser les fondemens de cet Estat : C’est rompre
les liens qui vnissent la Souueraine Puissance auec ses Sujets :
C’est destruire le canal qui sert à faire passer les volontez
du Roy pour les faire entendre à son peuple. Plus vne puissance
est souueraine & absoluë, plus elle a besoin de conseruer la
dignité des Puissances souueraines. Dieu semble nous en auoir
voulu donner l’exemple, lors qu’il a voulu gouuerner les
corps infirmes ; de mesme les Roys ayans creez les Compagnies
Souueraines pour estre les Mediateurs entr’eux & leurs
Suiets, & les Executeurs de leurs Edicts, ne doiuent point rompre,