[retour à un affichage normal]

Mazarinade n° B_12_9

Image de la page

Charpentier (?) [?] [1652], LA HARANGVE FAITE AV ROY, PAR MONSIEVR CHARPENTIER CONSEILLER EN PARLEMENT & vn des Deputez vers sa Majesté, pour l’esloignement du Cardinal Mazarin, & pour la conclusion de la Paix generale. Prononcée à sainct Denis le huictiesme Iuillet mil six cens cinquante-deux. , françaisRéférence RIM : M0_1595. Cote locale : B_12_9.

dit y auoir long-temps qu’il estoit demeuré couuert,
voulant faire croire par là à V. M. que ce
feu n’estoir autre chose que l’ambition qu’auoient
Messieurs les Princes de vostre Sang Royal, de vouloir
enuahir vostre Authorité ; mauuais pretexte à
cét homme, puis que c’estoit plustost pour son restablissement
aupres de V. M. que pour esteindre ce
feu, qui au lieu de l’auoir esteint dans son abord ; l’a
allumé auparauant qu’il soit aupres de V. M. par
vne action inoüye & la plus extraordinaire qui ayt
iamais esté faite, puis qu’il a non seulement violé
les Loix les plus sacrees du Royaume, contreuenu
aux parolles Royales de V. M. portée par sa Declaration
du 6. Septembre dernier, mais encor empesché
ceux qui estoient preposez pour l’execution d’icelle,
comme il se peut voir par le procez verbal de
Messieurs Bitaut & de Geniers Conseillers en vostre
Cour de Parlement de vostre bonne Ville de
Paris, dont l’vn a esté mené prisonnier honteusement
iusques à Poictiers, & l’autre contraint de se
retirer en desordre dans vne bonne ville & parmy
les Sujets de V. M. où il n’a peû trouuer sa seureté, à
cause des menaces qu’il a fait faire aux Habitans de
cette Ville, que s’ils ne le remettoient entre ses
mains, il feroit mettre le siege deuant ladite ville &
l’auroit de force, V. M. SIRE, n’approuuera pas ces
desordres, puis qu’il n’y a aucun exemple qui fasse
voir que l’on puisse prendre vn Officier d’vne
Cour Souueraine dans la fonction de sa charge, &