[retour à un affichage normal]

Mazarinade n° B_5_24

Image de la page

Anonyme [1649], LA RESSEMBLANCE DE MADAME LA DVCHESSE D’ORLEANS A LA COLOMBE QVI APPORTA LE RAMEAV d’Oliue à Noé. Presenté à son Altesse Royale. , françaisRéférence RIM : M0_3516. Cote locale : B_5_24.

C’est aussi cette haute charité qui vous fait admirer comme le
Buisson ardent de Moyse, & qui nous fait dire comme sainct Paul ;
que vous ne viuiez point en vous : mais toute en Dieu. C’est cette
charité qui vous rauit souuent en extase, comme le mesme S. Paul
qui vous fait dire comme S. Bernard. Que vous estes toute pleine
d’amour : mais de cét amour diuin qui embrase les Seraphins, qui resjoüit
& enflamme les Bien heureux, & qui viuifie les Saintes Ames
sur terre. Enfin c’est cette charité qui est espanchée dans vostre ame,
& qui porte vostre cœur à aymer vniquement Dieu, comme la
source de toutes les douceurs & de toutes les delices. Mais cette
grande charité est tousiours accompagnée des tendresses pour le
prochain, & si vous aymez respectueuse ment le Createur, vous aymez
Chrestiennement ses Creatures, & principalement ses Pauures,
dans lesquels vous recognoissez sa viuante Image, & vostre
ressemblance ; Ouy Madame, il n’y a personne qui ne sçache que
vous aymez tellement les Pauures, que vous taschez desubuenir à
leur necessitez, & à les retirer de leur misere. Il n’y a personne qui
ne sçache que vostre profonde humilité vous faict regarder toutes
personnes, comme creées de Dieu, aussi bien que vous, & comme
ses vrayes Images.
C’est enquoy il n’y a personne qui ne iuge de vostre innocence
& de vostre candeur. Quand on vous void embrazée d’vne si grande
charité, on sçait que vous n’estes capable d’aucun peché, puis que
Vostre Altesse Royal ne se plaist que dans l’exercice des Vertus,
on sçait que toute vostre vie est vn tableau de l’Innocence où toutes
les Vertus sont naïfuement representées par la Theorie & par la
praticque, on sçait que vous auez vne si grande horreur du vice que
vous ne pouuez souffrir aucun vicieux, & que vous haissez toutes
les infames, on sçait que comme cette glorieuse Vierge dont vous
portez le nom, vous foulez au pied le Dragon Infernal, pour ne luy
donner aucune prise sur vostre innocẽce, on sçait que plus il esprouue
vostre Vertu, plus vous paroissez inuincible, & plus vous resistez
à ses attaques ; Enfin on sçait que c’est Vostre Altesse Royal qui est
le vray miroir de l’Innocence, & l’elixir de la candeur.
Ie ne diray rien dauantage de vostre chasteté, puis que toute la
terre la sçait, & que vostre innocence en est vn fidelle tesmoignage ;