[retour à un affichage normal]

Mazarinade n° A_4_19

Image de la page

Anonyme [1649], LA HARANGVE DES PROVINCIAVX FAITE A LA REINE POVR LE PROCHAIN retour du ROY en sa bonne ville de Paris. , françaisRéférence RIM : M0_1557. Cote locale : A_4_19.

ce sera impuissance qui causera ce Malheur.
 
Cependant les armées ne peuuent rien faire dans l’indigence,
il faut necessairement de l’argent pour exploicter. Quand
mesme vous en auriez pour passer mediocrement la campagne,
ce ne pourroit estre pour les soldats. Si pendant que
nous estions encores riches, ils ne touchoient quasi rien, il
n’y a pas d’apparence que dans vne pauureté si extréme on
puisse les payer ; & toutesfois si ne sçauroient ils viure sans
payer. Quoy donc ? apres qu’ils auront passé l’Esté à voir
les progrez des ennemis sans faire autre chose que mourir
de pauureté, ou seruir de tesmoins à leurs victoires, il faudra
pendant l’Hyuer les faire rafraichir dans les Prouinces, &
alors le reste des malheurs du peuple s’accomplisant, n’en
deuez vous point, MADAME, apprehender vostre
propre perte.
Vous sçauez, MADAME, que quand on est reduit
à l’extremité & que l’on ne voit plus d’espoir, l’on ne reconnoist
point de crainte. Or quand la crainte est vne fois
dissipée, le respect aussi-tost s’esuanoüist, Cette verité fatale
commence desia à nous faire voir beaucoup de dangereuses
experiences. Plusieurs se licentient à dire & plusieurs
mesmes à escrire des choses que des subjets ne deuoient pas
mesmes penser. Se sont, MADAME, des commencemens
dont les suittes sont bien dangereuses, & comme le malheur
qui en est la cause croist & s’augmente auec plus de promptitude
que les fruits de la terre ne font en cette belle saison, il
est sans doute que la licence deuiendra tousiours plus grande
& plus menassante iusques à ce qu’elle soit arriuée à ce
poinct de force & de puissance, où il sera egalement innutile
& de la combattre & de la redouter.
Deuez vous esperer, MADAME, que tant de miserables
qui n’auront plus rien à perdre ayent quelque chose à considerer.
Il n’y a point de grandeur ny de Majesté enuers des
ames qui n’en ont receu que des tourmens & des ruines.
Vous portez les carracteres que vos subjets doiuent venerer.
Mais vous croyans la cause de leur perte, ils ne treuuerront