[retour à un affichage normal]

Mazarinade n° B_16_32

Image de la page

Anonyme [1652], LA GVERRE MOVRANTE PAR LA NECESSITÉ DE FAIRE LA PAIX. PROVVÉE PAR LES MEILLEVRES Maximes du Gouuernement des Estats. , françaisRéférence RIM : M0_1530. Cote locale : B_16_32.

tousiours craint la victoire de l’autre, comme vne
resource de malheurs, & vn renouuellement de
tyrannie : Mais enfin l’on a reconnu par diuers
témoignages qu’ont rendu de leurs intentions les
Chefs du party le plus fauorable, qu’ils n’auoient
gueres de meilleurs desseins que les autres, &
que s’ils auoient vn iour l’avantage, ce seroient,
comme dit Tacite, d’autres hommes, & non d’autres
mœurs. L’on a veu que tout ce qui les tenoit
en armes, n’étoit que le dépit de ne donner
pas à leur gré le bransle à l’Estat, de voir vn
Estranger disposer à leur préiudice des principales
charges, & des reuenus de tout l’Empire, sans
que l’interest du public, & du bien des Peuples,
se mêlast à leur passion, pour les obliger de prendre
nostre cause en main pour se rendre plus fauorables ;
C’est ce qui sans doute auroit détaché
tous les cœurs du desir de se sacrifier pour leur
seruice, si ceux du party de la Cour n’auoient
voulu nous traitter tousiours en esclaues ; & ne
s’estoient monstrez si fort insolents dans les moindres
avantages qu’ils obtenoient sur leurs ennemis,
qu’ils ne nous menaçoient de rien moins que
de sac, & des dernieres extremitez : D’où vient
que comme naturellement nostre inclinatiõ nous
porte à fauoriser tousiours le party des plus foibles,
& que nostre haine agit plus fortement
contre vne rigueur opiniastre & éprouuée que