[retour à un affichage normal]

Mazarinade n° C_10_33

Image de la page

Mercier,? [signé] [1649], LE THRONE ROYAL ET MAGNIFIQVE DE LOVIS XIV AVGVSTE ET DIEV-DONNÉ. , françaisRéférence RIM : M0_3897. Cote locale : C_10_33.

aucun crime, vous pouuez former les mesmes desseins,
& dans l’ardeur d’vne generosité Chrestienne, aspirer
à la gloire de regner aussi auantageusement dans le
Ciel, que vous commencez à regner puissamment
dans la terre. Vostre vertu peut tout, animée de la grace :
vostre courage ne doit point rencontrer de difficulté,
qu’il ne surmonte : vostre pieté n’aura ny bornes
ny limites, & dans le chemin de la perfection &
de l’Amour Diuin, vostre Ame ne se lassera point, &
ne dira iamais assez.
 
Le Prophete iure, que le Thrône de Dieu est semblable
à la lumiere du iour, ou bien au iour du siecle.
Voulant dire, que comme la lumiere du iour croist
tousiours iusques à ce qu’elle soit arriuée en son plein
midy, & que pendant l’espace d’vn siecle, elle communique
beaucoup de splendeur, & répand beaucoup
de rayons ; qu’ainsi la vertu dans vne ame Royalle, qui
est proprement le veritable Thrône de Dieu, augmente
de iour en iour en grace & en merite, & par vn miracle
d’amour lance à tous momens de nouueaux
feux, & se fait admirer de tout le monde.
Ie puis asseurer, SIRE, que vostre Thrône est
enuironné de flambeaux & d’Astres qui éclairent également,
& l’Eglise & la Cour : mais ce qui est de plus
miraculeux, c’est que leur lumiere n’est iamais obscurcie,
ny par les tenebres des passions, ny par les nuages
des feblesses humaines, ny par les vapeurs d’vne conscience
corrompuë : il pousse tousiours des élans qui
surprennent les plus religieux, & ses diuines clartez
s’augmentent sans interruption & sans relasche.
C’est de ce Thrône, SIRE, d’où l’on attend tant
d’oracles & Arrests Diuins, qui rendront les peuples
heureux, & les Prouinces florissantes. C’est de ce
Thrône de Iustice, d’où partiront ces Decrets de Sagesse
& d’équité, qui tiendront les Princes dans vne
suspension d’esprit, & les Sujets dans des respects