Mazarinade n° C_10_33
Image de la page
Mercier,? [signé] [1649], LE THRONE ROYAL ET MAGNIFIQVE DE LOVIS XIV AVGVSTE ET DIEV-DONNÉ. , françaisRéférence RIM : M0_3897. Cote locale : C_10_33.
du gros de l’armée, & d’où seulement il pouuoit estre
veu, aussi bien de ses Soldats, que de ses Generaux.
SIRE, vostre Ame Diuine est trop genereuse pour
establir son bon-heur, ny dans l’éclat des Couronnes,
ny dans la magnificence des Thrônes, & neantmoins
nous pouuons asseurer, que le vostre n’eut iamais son
semblable, que la terre ne vit iamais rien de plus beau,
ny le Ciel de plus merueilleux ; il donne de l’estonnement
aux Anges, de l’admiration aux hommes, de
la jalousie aux Saincts ; & les plus grands Monarques
du monde l’enuisagent, comme l’obiect de leurs desirs,
ou comme la fin de leurs plus ardens souhaits ; Ils
ne se contentent pas d’estre Roys, s’ils ne sont esleuez
dessus le mesme Thrône que vous ; & leur Empire semble
n’auoir rien d’heureux, s’il ne participe aux qualitez
que vous possedez.
Oserois-je asseurer, SIRE, qu’à l’imitation de celuy
dont vous estes la parfaite image, vous auez placé
vostre Thrône au dessus des nuës, parce qu’il doit
gouuerner tous les autres de l’Vniuers, & les mortels
sont indignes à present de connoistre ses grandeurs,
parce qu’il est trop esleué pour en pouuoir discerner les
excellences, ou en enuisager l’éclat : mais deslors que
vos armes victorieuses, & vos mains triomphantes les
auront contrains de l’adorer, vous verrez, SIRE,
combien ils s’estimeront heureux de luy rendre obeïssance.
Oüy, vostre Thrône, non seulement est au
dessus des Cieux, mais aussi encore au dessus des Anges ;
& pour en parler en verité, comme sans flaterie,
il est dedans vostre interieur, & la mesme Ame, qui
est le Thrône de Dieu, & la demeure du Sainct Esprit,
est le siege où resident ses vertus, ses perfections, ses
bontez & ses graces.
Lucifer aueuglé de sa propre ambition, desira autresfois
de s’éleuer iusques dans le Thrône de Dieu, &
se rendre semblable à son Souuerain. Sans commettre
Image de la page