Mazarinade n° C_4_3
Image de la page
Laffemas, abbé Laurent de [?] [1649], L’ENFER BVRLESQVE, OV LE SIXIESME DE L’ENEIDE TRAVESTIE, ET DEDIÉE A MADAMOISELLE DE CHEVREVSE. Le tout accommodé à l’Histoire du Temps. , françaisRéférence RIM : M0_1216. Cote locale : C_4_3.
Il est d’vne assez longue haleine,
Pour meriter qu’on se promeine ;
Anchise le conduit par tout,
A trauers champ de bout en bout,
Enfin de sa gloire future,
Il luy charbonne vne peinture,
N’allez, dit-il, faire faux bon,
A tous ces Messieurs de renom :
A moins que vostre cœur responde,
Ils vous iront rosser au monde ?
N’allez pas faire vn pas de clerc,
Tous nos discours seroient en l’air,
Veüillez aussi vaillant paroistre,
Que ces enfants qui sont à naistre ;
Aprés il l’enseigne comment
Faire en certain euenement
Les embuscades, les batailles,
Les assauts liurez aux murailles,
Toutes les guerres de Turnus,
Tant qu’Æneas n’en veüille plus,
En ce pays on void deux portes,
Qui ie croy doiuent estre fortes,
Quoy que Virgille ne l’ayt dit,
Mais on peut rimer à credit :
Il dit que là passent les songes,
Qui sont vrays ou qui sont mẽsonges,
S’ils sont vrays qu’on les fait passer,
Deux à deux & sans se presser,
Par la porte faite de corne :
Si quelquefois l’oreille corne
Que ce ne soient qu’illusions,
Que fantosmes, que visions,
Ceux-là par la porte d’yuoire,
Viennent embroüiller la memoire,
Et ce fut par ce dernier huis,
Qu’Anchise ramena son fils,
Il ne dit point comme ils sortirent,
Ny les compliments qu’ils se firent :
Encor que n’en parle l’autheur,
Tu peux penser, amy Lecteur,
Qu’adieu mon fils, adieu mon pere,
Ce fut leur parole derniere.
On lit que le bon Æneas,
S’en alla le plus viste au pas,
Dire qu’en mer on se remette,
Qu’il fit cingler droit à Gayette,
Qu’on ietta l’anchre du vaisseau.
Et moy qui treuue qu’il fait beau,
Las d’estre tousiours sur des chaises,
I’ay voulu pour prendre mes aises,
Ietter la plume de la main,
Adieu Lecteur iusqu’à demain.
FIN.
Image de la page