[retour à un affichage normal]

Mazarinade n° D_2_33

Image de la page

Laffemas, abbé Laurent de [?] [1649], LA GVERRE CIVILE En Vers Burlesques. , françaisRéférence RIM : M0_1522. Cote locale : D_2_33.

Dont pourtant i’ay pleine la pance.
Ce qui me fait plus enrager
C’est de voir Paris assieger
Quelle pitié ! quelle vergogne !
Par des Diables nez en Pologne
Des monstres septentrionaux
Qu’vn iour ie verray bien penaux ;
Car ayant pillé les villages
Ils croyoient porter leurs rauages
Iusques dans le cœur de Paris
Où reste encor quelque Louys,
Pour leur épargner donc la peine
D’en faire autant qu’au Bourg la Reine.
Le parlement qui n’est pas sot
A Themis fit prendre le pot
Qui sied mieux dans l’échaffourée
Qu’vn bonnet à forme quarée,
Et troqua contre vn iuste au corps
Fourrée dedans & sur les bors,
Sa robbe d’hermite doublée
Dont elle estoit emmitouflée,
Iusqu’à luy donner en soudart
Vn manchon de peau de renard.
L’on trouue qu’elle a bonne mine
Corcelet moitié sur poitrine
Et l’autre moitié sur le dos
Pour se garantir d’Atropos,
Et pour mieux luy faire la nique
On luy mit en main vne pique,
D’autres disent vn pistolet
Et d’autres disent vn mousquet,
Selon la brauache coustume
A la teste elle mit sa plume,
Et changea si bien de mestier.
Qu’elle prit vn autre mortier.
Oüy la bonne Dame iustice
A quitté iusqu’au pain d’épice,
Et ne trouue rien de si bon
Que le pain de munition,
Le Bourgeois voyant l’equipage
De la Deesse iuste & sage
Qu’il cherit, & reuere tant
D’abord en voulant faire autant,
Et d’vne bonne intelligence
Pour se sauuer de l’indigence
Dont le menaçoit Mazarin
Voulut combattre pour du pain,
Car du reste de la cuisine
Il ne craignoit pas la famine,
Et mesme si ie l’entends bien.
Maintenant il ne craint plus rien.
il ne parle que de se batre
Chacun se fait tenir à quatre
On veut malgré le general
Sortir à pied ou à cheual,
Et des cohortes ennemies
On en veut faire des rosties.
il est vray qu’au commencement
On estoit dans l’estonnement,
Car le premier iour des vacarmes
Où l’on n’auoit point de gens-d’armes,
Le peuple disoit tout troublé
Ie sons pris comme dans vn blé.
Moy-mesme qui vous en fait rire
Ne me voyant pas dequoy frire,
ie disois si le pain est cher
Le pauure n’en sçaura mascher.
Car le riche peu charitable
Ne songera que pour sa table
Et l’vsurier faiseur de pain
Voudra de l’argent auant main.
Tout le secret de mon optique
C’estoit de voir vne boutique
Qui produisit Dame Cerez
A trauers balustres, & rets :
Quand i’en voyois vne fermée
Mon ame estoit toute alarmée ;
Et croyois que le boulanger
Luy-mesme n’eut pas à manger
Peu souuant passant par la ruë
Quelque pain s’offroit à ma veuë
Mais accompagné comme vn Roy,
Et vous eussiez dit d’vn conuoy,
Non pas comme celuy qu’on porte
A l’Eglise d’vne autre sorte,
Quoy qu’il fut sacré pour mes mains
Autant que reliques des Saints.
Maintenant sans aucune garde