Mazarinade n° C_1_19
Image de la page
Anonyme [1649], LA CONFERENCE DV CARDINAL MAZARIN AVEC LE GAZETIER, Iouxte la coppie Imprimée à Bruxelles. , françaisRéférence RIM : M0_742. Cote locale : C_1_19.
general de la maison, personne, & education du Roy ? qui
iamais a possedé de plus grandes charges ? & n’ay-ie pas inuenté
tous ces nouueaux tiltres, afin de confondre toutes les charges en
vne, & ne laisser rien aux autres, ny au Roy mesme que le nom ?
Pour les gouuernemens qui en dispose, que moy ? N’ay-ie pas fait
arrester Rantzau, afin de mettre dans Dunkerque vn hõme qui est
plus à moy, que ton nez n’est à toy mesme ? Si personne ne sçauoit
rien de cela, tu aurois raison ; mais estant notoire, comme il est à
tout le monde, qu’elle apparence que cela puisse faire l’effet que
tu pretendois ? En second lieu, pour parler de mes facultez, & me
faire passer pour incommode, tu as encor plus mal pris tes mesures.
Il falloit auparauant persuader, que ces superbes escuries &
& galeries que i’ay fait bastir, n’estoient que des phantosmes du
Demon pour tromper les enfans : que ces meubles superbes, le reste
de ce que ie n’ay pû emporter, vn nombre si prodigieux de statuës
& de figures antiques & modernes, & de si grand prix qu’vne
seule est estimée quatre cẽt mil l. sans parler de celles qui n’õt point
de prix, que celuy que la curiosité des Monarques leur peut dõner ;
il falloit dis-ie, leur persuader que tout cela n’estoit que ieu de Marionnettes,
& tours de passe-passe de charlatans, ou ioüeurs de gobelets
sur le Pont-neuf, auant que d’entreprendre de dire que ie
ne suis pas plus riche à present que ie n’estois il y a six ou 7ans, lors
que ie n’auois rien, & n’estois qu’vn pauure Argolet. Aussi ne doutay-ie
point que cela n’ait bien apresté à rire, & n’ait esté matiere
de comedie pour les vendeuses de marées aux halles, cependant
que le blocus empeschoit d’en venir de Normandie.
Gaz. Il faut bien que ie sceusse tout cela, puis que i’en sçais bien
d’autres, & que ie ne suis pas prest de dire : Ie n’ay pas pourtãt laissé
de faire effort sur ce point pour deux raisons. La premiere, qu’encore
que les personnes de qualité & la pluspart du bourgeois en
ait la connoissance : Neantmoins les Artisans & le petit Peuple,
qui sont ceux dont nous auons besoin pour faire sedition, & qui la
peuuent faire ne le sçauant pas, & s’ils en sçauent quelque chose,
c’est par le moyen des Fripiers qui ont acheté vne partie de vos
meubles. Car les gardes qui estoient aux portes ne laissoient entrer
presque personne, que ceux qui estoient en carrosse, en quoy
vous leur auez de l’obligation : & i’ay oüy dire qu’vn iour quantité
de personnes de qualité, parmy lesquels il y auoit des Presidens
& des Conseilles d’Estat, admirant la merueille de tant de raretez,
dont la galerie haute est remplie, où l’on disoit qu’on offroit cinquante
Image de la page