Mazarinade n° D_1_26
Image de la page
P. I. R. C. [signé] [1650], PROPOSITIONS ET LES MOTIFS PRESENTEZ A NOSTRE SAINT PERE LE PAPE Innocent X. du nom, en cette année Sainte de Iubilé 1650. par le Reuerend Pere IEAN ROÉ, Carmelite Hybernois. En faueur de Charles second Roy de la Grand’Bretagne, d’Ecosse & d’Hybernie. Pour son establissement, & conseruation de la Religion Catholique, Apostolique & Romaine en ses Estats. , françaisRéférence RIM : Mx. Cote locale : D_1_26.
desdits deux Roys, sçauoir Charles I. & Charles II. negotia & conclud
heureusement la paix, par le moyen de laquelle paix le Roy coniointement
auec les Catholiques ses Subjets, a entrepris vne guerre irreconciliable
contre les Parlementaires, qui n’ont pas moins de dessein
de faire en la personne du fils, ce qu’ils ont fait en la personne
du Pere.
De plus sa Saincteté remarquera encores, Que ces infames abominables
Regicides vsurpans iniustement & s’attribuans toute l’authorité
Royale, persecutent auec toutes les cruautez imaginables
tous les pauures Catholiques tant en l’Hybernie qu’en l’Angleterre,
Bannissent les vns, jettent les autres dans les Cachots, & leur font
souffrir toute sorte de tourmens ; Et apres auoir confisqué & enuahy
les biens de plusieurs autres, les font mourir cruellement. Témoins
les estranges carnages qu’a fait le General Cromouelle dans
toutes les Villes qu’il a prises, & sur tout dans celles de Pontare,
Vaxfordie & autres lieux, où il a fait passer par le fil de l’espée,
sans exception d’aage ny sexe, tous les Catholiques qui ce sont
trouuez.
Tesmoins encore ceux qui souffrent presentement dans les lien &
dans les chaisnes audit Royaume d’Angleterre, où la persecution
contre les Catholiques est plus grande & plus cruelle qu’elle n’a iamais
esté ailleurs. Ce qui fait assez cognoistre, que l’intention de ces
Regicides & Tyrans Parlementaires auec la pacte & conuention
qu’ils ont auec leur Dieu, qu’ils appellent, n’est autre que de defaire
enfin tous les Catholiques, D’esteindre & d’aneantir par toutes les
parties du monde, la Foy & Religion Catholique, ne faisant point
de difficulté de publier tout haut, Qu’apres qu’ils auront asseurez les
affaires du dedans de leurs Estats, ils se jetteront sur leurs voisins,
puis s’empareront de l’Allemagne, de l’Italie & de toute l’Europe,
& depossederont tous les Roys & les Monarques, qui leur sont si
odieux & qu’ils abhorrent si merueilleusement. Et en vn mot, ils
n’ont rien si à cœur que ces deux choses, Sçauoir l’aneantissement
de la Religion Catholique & la ruine de toute la Monarchie : Et comme
le feu Roy, & Charles second son Fils, ont tousjours témoigné
de l’horreur pour vn tel dessein, voila pourquoy ils ont fait mourir
le premier, & laissent le second comme vn exilé ; & par vne hardiesse
& audace toute pleine de meschanceté, se disent desja Republique.
Image de la page