[retour à un affichage normal]

Mazarinade n° D_1_3

Image de la page

Morgues, Mathieu de [1643], LES DEVX FACES DE LA VIE ET DE LA MORT DE MARIE DE MEDICIS ROYNE DE FRANCE VEFVE DE HENRY IV. MERE DE LOVYS XIII. ROYS TRES-CHRESTIENS. DISCOVRS FVNEBRE. Par Messire MATTHIEV DE MOVRGVES Sr. de Sainct Germain, Docteur en Theologie, premier Aumosnier & Predicateur de ladite DAME ROYNE; Predicateur du ROY CATHOLIQVE, & Preuost de Harlebeke en Flandres. DEDIÉ A LA ROYNE CATHOLIQVE. , français, latinRéférence RIM : Mx. Cote locale : D_1_3.

miserablement massacré ; il semble que toutes les
prosperitez de la Royne deuoient finir auec la vie
de son cher espoux, qu’elle regreta grandement : mais
sa puissance fit croistre sa felicité. La Royne fut sans
aucune contradiction declaree & receue Regente du
Royaume, & Tutrice du Roy Mineur. Les richesses
que le Roy Henry IV. auoit laissé firent dire, que le
commencement de cette Regence estoit vn siecle
d’or ; & donnerent moyen à la Regente d’appeller
& d’appaiser les esloignez & les mescontens ; de
gratifier ceux qui pouuoient & vouloient bien seruir,
& de metre à leur aise tous les Princes & Grands,
que le Roy Henry IV. auoit par maxime d’Estat
tenus dans la mediocrité. On ne voyoit, & on ne
publioit dans la Cour de France que les effets de la
liberalité de la Regente, qui appuyoit son authorité
par les bienfaits & releuoit la Maiesté de son Gouuernement
par cent Gentils hommes de sa garde,
couuerts de hocquetons de velours brodé d’or &
d’argent, & par vne suite ; dãs laquelle tous les Princes
& Princesses qui s’y trouuoient, prenoient pour les
faueurs singulieres ses œillades, & pour vn subiect
de vanité, vne de ses paroles. Sa puissance estoit
absolue, & heureuse : elle creoit les Cardinaux en les
recommendant ; nommoit les Prelats ; donnoit les
Gouuernemens des Prouinces & des places, les
premieres charges de la Maison du Roy, & dans le