[retour à un affichage normal]

Mazarinade n° B_12_61

Image de la page

Malenfant,? de [signé] [1652], TRES-HVMBLES REMONSTRANCES DV PARLEMENT DE THOLOSE FAITES AV ROY, Et pour la surseance de la Declaration de sa Majesté contre Monsieur le Prince. , françaisRéférence RIM : M0_3834. Cote locale : B_12_61.

TRES-HVMBLES REMONSTRANCES
du Parlement de Tholose, faites au Roy.
SIRE,
Vostre Parlement de Tholose n’a rien
oublié dans l’occasion des mouuemens presens,
de ce qui pouuoit dépendre de sa prudence
& de l’authorité que vous luy auez commise pour
conseruer le repos public, & le respect deu à V. M. dans
l’estenduë de son ressort.
Quand les Troupes qui seruoient en l’armée de Catalogne
ont paru soudainement au voisinage de Tholoze, elles
portoient encore vos enseignes, & toutes les marques d’estre
à vôtre seruice. Le Parlement qui n’auoit aucun ordre,
ny aucun aduis pour sa conduite, a esté veritablement surpris ;
mais il n’a pû estre trompé, son zele luy a fait faire sans
hesiter le discernement necessaire. Il a cogneu ces deserteurs,
& les a fait cognoistre à vos peuples auparauant
qu’ils luy ayent esté monstrez par vostre Declaration. Il les
a poursuiuis par ses Arrests, & par ses Commissaires ; & en
faisant tout ce qu’il pouuoit dans vne conjoncture si precipitée,
il a tesmoigné sa preuoyance & sa fidelité.
Le Languedoc estoit agité d’vne diuision qu’on peut
appeller domestique, les Estats de cette Prouince poussez
par le Cardinal Mazarin auoient mal à propos offencé
le Parlement, toute la Prouince restoit scandalizée
d’vne rupture si impréueuë ; Il estoit de nostre deuoir