[retour à un affichage normal]

Mazarinade n° C_3_48

Image de la page

Latour,? (capitaine) [?] [1649], LETTRE DV CAPITAINE LA TOVR CONTENANT LA REFVTATION des Calomnies imposées au party du Parlement, & de la Ville de Paris. , françaisRéférence RIM : M0_2083. Cote locale : C_3_48.

que i’estime ne pouuoir mieux employer mon
sang & ma vie, que dans ce deuoir, comme reconnoissant
mon Prince estre la viue image de la
Diuinité. Ie ne laisse pas pourtant d’estre fermement
persuadé que les armes du Parlement & de
la ville de Paris sont iustes, & qu’ils peuuent non
seulement resister aux Ministres d’Estat & au
Cardinal Mazarin : mais mesmes en cette occasion
combattre contre la Reyne Regente, quoy qu’ils
se contentent de porter seulement leur dessein
contre le mauuais conseil dont elle est preoccupée,
& ie m’asseure que quand vous en aurez examiné
les raisons, vous serez de mon aduis, & aduouërez
que tout vray François est obligé d’embrasser
leur querelle, tant pour son interest particulier
que pour l’interest public, & pour le seruice
du Roy & de l’Estat. Car premierement ce n’est
pas vne querelle particuliere du Parlement auec
le Cardinal Mazarin, comme quelques esprits malicieux
& ennemis de leur propre patrie, veulent
persuader au mesme peuple, mais elle est commune
à tout l’Estat, puis que Messieurs du Parlement
ne sont en cette peine que pour n’auoir voulu
consentir à l’aneantissement des salutaires reglemens
que leurs Maiestez leur accorderent au mois
d’Octobre dernier pour le soulagement des peuples,
& au restablissement des prests, des Parties
des Tailles, & des affaires au mesme estat qu’elles
estoient auparauant que le Cardinal Mazarin