Mazarinade n° A_5_14
Image de la page
Latour,? (capitaine) [?] [1649], LETTRE DV CAPITAINE LA TOVR CONTENANT LA REFVTATION des Calomnies imposées au party du Parlement, & de la Ville de Paris. , françaisRéférence RIM : M0_2083. Cote locale : A_5_14.
fait de toutes les finances du Royaume ; certainement, il n’y a chetif
en France, qui ignore que le Roy n’estant pas encore en aage
d’agir, on ne luy peut point aussi imputer les oppressions qui se
font sur son peuple sous son nom, ny personne dans Paris, qui n’y
souhaitte son retour auec vne extréme passion, & qui ne combatte
auec vne affection entiere, pour la conseruation des interests de
sa Maiesté, estant tout asseuré de receuoir de sa bonté, & de sa clemence,
des tesmoignages d’vne bien-veillance, veritablement
Royale, & paternelle, lors que Dieu luy aura fait la grace de paruenir
à sa Majorité.
Il est vray, me dites-vous, que le Cardinal Mazarin fait toutes
ces choses de l’authorité de la Reine Regente, qui semble n’estre
pas moins absoluë que le Roy ; mais quand ainsi seroit que la Reine,
en qualité de Regente & administratrisse de l’Estat, n’auroit
pas vn pouuoir moins absolu que le Roy ; (ce qui est contre les
loix fondamentales du Royaume ; qui ne luy permettent pas d’y
rien innouer pendant la minorité.) Cette consideration neantmoins,
n’empesche pas que la deffence du Parlement, & de la
Ville de Paris, ne soit legitime, & qu’ils ne puissent s’opposer par
les armes, contre les attaques que leur fait à guerre ouuerte le
Cardinal Mazarin, sans pourtant déroger au respect qu’ils doiuent
au nom du Roy mineur qu’il vsurpe, & de la Reine Regente qu’il
deçoit par ses pernicieux conseils : & la raison en est, qu’il est question
en ce rencontre du salut du Peuple, & de tout l’Estat, auquel
toutes autres considerations doiuent ceder ; car le Cardinal Mazarin
ne veut destruire le Parlement de Paris, que pour abbattre
d’vn contre-coup tous les autres Parlemens de France, afin de
pouuoir disposer apres à sa volonté, & sans resistance, de la vie, &
des biens de tous les François, ainsi qu’il auoit fait par le passé, &
se rendre finalement maistre absolu du Royaume, par la perte du
Roy, & des Princes du sang, dont il s’est saisi à cét effet, auec intention,
sans doute, de s’en deffaire quand bon luy sembleroit,
apres que sous leur nom, & par leur authorité, il auroit destruit le
Parlement, & la Ville de Paris, comme les seuls qu’il croyoit
pouuoir s’opposer à sa tyrannie ; ce qu’il croyoit de pouuoir facilement
executer, en affamant la Ville de Paris : Tellement que
cette maxime demeurant pour constante parmy tous les Politiques,
que le salut du peuple est la souueraine loy de l’Estat ; en
sorte que les Rois mesmes sont obligez à l’obseruation d’icelle,
contre leur propre interest, estans establis pour l’vtilité & la conseruation
des peuples, & non pas les peuples pour eux, & le mauuais
dessein du Cardinal Mazarin contre cét Estat, estant tout notoire
Image de la page