[retour à un affichage normal]

Mazarinade n° B_1_1

Image de la page

La Mère de Dieu, Pierre de (dit Bertius, Abraham) [1647], LES VERTVS ROYALES D’VN IEVNE PRINCE. , français, latinRéférence RIM : Mx. Cote locale : B_1_1.

si par leur constellation nous entrons en connoissance
de leur future felicité ; il me sera permis de
dire, qu’en la glorieuse naissance des Roys de Frãce,
les Astres promettent des merueilles, & font
distiller la rosée de leurs influences, sur nos ieunes
Princes, & les ornent des plus riches dons de la
nature. Quelques Docteurs ont pense qu’à la
naissance des Monarques, Dieu faisoit paroistre
vne nouuelle Estoille, pour honorer leur arriuée
en ce monde ; & ont voulu adiouster que cette
Estoille estoit plus, ou moins éclattante, selon
l’excellence du ieune Prince ; Si cela auoit du fondement,
& du rapport auec la verité, & n’estoit
point refuté par sainct Augustin, & les anciens
Peres de l’Eglise ; ie dirois qu’en la naissance des
Roys de France, paroist vne Estoille merueilleusement
brillance, pour faire entendre à tout l’Vniuers,
que le premier, & le plus puissant Monarque
du monde, nous honore de sa presence, &
vient pour commander des peuples, parfaittement
soumis à son Empire.
 
Mais puis que la premiere nourriture contribuë
beaucoup à former le sang des ieunes
Princes, & qu’ils succent auec le lait, les bonnes
qualités des nourrices ; i’ay suiet de croire, que nos
Roys n’ont pas vne goutte de mauuais sang dans
les veines, puis qu’on apporte tant de diligence
en l’élection de leur mere de laict, que tout le
Royaume semble faire couler des fontaines sucrées,