[retour à un affichage normal]

Mazarinade n° A_9_27

Image de la page

Hanniques de Benjamin, Charles de [signé] / Gondrin, L. Henry de [signé] [1650], PROCEDVRES FAICTES CONTRE LES PP. IESVISTES DE LA VILLE ET DIOCESE DE SENS, ET ORDONNANCE DE MONSEIGNEVR L’ARCHEVESQVE. PORTANT DEFFENCES AVSDITS PERES d’Administrer le Sacrement de Penitence, sans permission & Approbation signée dudit Seigneur, où de ses Vicaires Generaux, sur les peines portée par jcelle. , françaisRéférence RIM : Mx. Cote locale : A_9_27.

ORDONNANCE
DE MONSEIGNEVR
L’ARCHEVESQVE.
LOVIS HENRY DE GONDRIN
par la grace de Dieu & du S. Siege Apostolique
Archeuesque de Sens, Primat des
Gaules & de Germanie. A Tous les fideles
Chrestiens de l’vn & l’autre sexe de nostre
Diocese, Salut. Bien que nostre soin Pastoral
doiue veiller sur toutes les choses qui regardent le
salut des ames que le S. Esprit a commis à nostre conduitte,
& que nous soyons obligez de nous opposer en toutes occasions
par l’authorité qu’il nous a donnée, à la mauuaises doctrine
& aux pernicieuses maximes de ceux qui sous pretexte
de pieté trauaillent à les seduire & à les perdre : Il n’y en
peut auoir neantmoins où nous soyons plus engagez de le
faire qu’en celles où il s’agist de l’administration des Sacremens,
& principalement de celuy de Penitence, lequel
estant le seul remede pour reparer l’innocence perdue apres
le Baptesme, il est tres important que tous les fideles sçachent
qu’outre la disposition qui est necessaire de leur part
pour receuoir l’effect de ce Sacrement, il faut encores que
celuy qui en est le Ministre aye la Iurisdiction pour l’administrer
ou par l’authorité de sa charge ou par l’approbation de
l’Euesque qui seul la peut donner dans son Diocese. Et quoy
que cette maxime soit tres-saincte, tres infaillible & tres-orthodoxe,
Nous auons appris auec vne extreme douleur,
que les Freres de la Societé du Nom de IESVS establis dans