[retour à un affichage normal]

Mazarinade n° C_5_66

Image de la page

Anonyme [1652], IOVRNAL DE TOVT CE QVI SEST FAIT ET PASSÉ EN PARLEMENT, Les Ieudy, Vendredy & Samedy, 10. 11. & 12. Octobre 1652. En presence de son Alt. Royale. AVEC LES ORDRES DONNEZ pour l’éloignement des Trouppes des enuirons de Paris. ET LES DERNIERS MOYENS pour la Paix. , françaisRéférence RIM : M0_1753. Cote locale : C_5_66.

arresté, que son Altesse Royale seroit prié de la part
de la Compagnie de venir en Parlement y prendre sa
seance pour luy representer ses desordres & le prier
pour la derniere fois de contribuer autant & plus qu’il
n’a iamais faict pour obtenir la Paix : Apres cela Monsieur
Seuin a dit, qu’il falloit considerer qu’il se faisoit
des assemblées par les Colonels de Paris en la maison
de Monsieur de Seyne Doyen d’iceux, qui tendoient
à faire la mesme chose que les six corps des Marchãds,
qu’il seroit nommé & choisi vne personne de chacune
Compagnie, que ce choix auoit esté faict, & que dans
icelles il y auoit plusieurs Messieurs de la Compagnie
que l’on ne consideroit pas pourquoy lesdites assemblées
ne se faisoient à l’Hostel de Ville, d’autant que
la plus par des Colonels ne vouloient pas ou faisoiẽt
quelque difficulté de recognoistre Monsieur le Duc
de Beaufort pour Gouuerneur de Paris, qu’il estoit à
propos de prier Monsieur de Beaufort de se demettre
volontairement de cette charge, ainsi qu’auoit faict
Monsieur de Broussel de la charge de Preuost des
Marchands, que cela feroit que le Roy voyant quelque
soubmission donneroit les passe ports que l’on a
tant de fois demandez, & que les affaires en yroient
mieux à l’aduenir.
 
Monsieur le President de Nesmond a dit, qu’il
estoit asseuré que Monsieur de Beaufort dans le moment
qu’il seroit prié de se demettre de la charge de
Gouuerneur de Paris il le feroit, & qu’il luy auoit souuentesfois
dit, & mesme dans le temps de sa derniere