Mazarinade n° C_5_64
Image de la page
Anonyme [1649], INSTRVCTION PROMPTE ET FACILE, AVX PARISIENS POVR BIEN APPRENDRE l’exercice du Mousquet & de la Picque, & les rendre par faits en l’Art militaire. , françaisRéférence RIM : M0_1709. Cote locale : C_5_64.
gauche ferme contre la hanche : mais quand on porte la picque haute pour la
presenter, lors on la peut poser en vn temps, comme aussi on la peut remettre en
vn mesme temps.
Mettez vos picques en terre.
Il faut aussi remettre, ou reposer la picque en terre en trois temps, ou en trois
prises, tout ne plus ne moins, que l’on l’auoit prise auparauant, & la faut mettre
iointe au pied droict, & la manier, ou tenir que le pouce soit à l’opposite, ou vis
à vis, de l’auteur de l’œil.
Portez vos piques hautes.
Lors la pique qui estoit posée en terre, il la faut releuer de terre, comme cy-dessus,
en trois temps, pour la porter haute & l’ayant prise par le bout, ou par la
hante en la main droite, il la faut porter sur le bras, ou contre le bras, comme nous
l’auons expliqué au premier commandement.
Presentez vos piques.
Comme il faut presenter sa pique en vn temps, ladite pique estant encore haute :
à sçauoir, il faut estendre le bras droict en arriere, en sorte que le coude vienne au
dessus de la hante, & que la pique soit couchée sous la paume de la main & non pas
sous le pouce, & le deuxiesme doigt, ou l’indice : Et que le bras droit soit appuyé
contre le corps au dessus de la ceinture, sans estre bandé, & ce pour tenir la pique
tant plus ferme, & pour repousser plus rudement. Item que le genoüil soit plié, &
que les deux pieds ayent leur vraye distance : car autrement l’on seroit trop foible
pour repousser l’ennemy, & pour donner de coups.
Prenez vos piques par la pointe, ou par le fer.
Comme l’on doit prendre la pique proprement, & auec bien seance par la pointe,
ou par le fer, & cela se fait en trois temps, ou prises, passant vne main par dessus
l’autre, & tenant le fer de la pique ferme sur la hanche contre le corps : ou bien
que l’on prenne la pointe de la pique auec la main droite, & qu’on la laisse vn peu
passer en auant, ayant le pouce droit estendu sur le fer, & le pied droit en auant.
Remettez-vous.
Comme de cette posture l’on se doit remettre, ou presenter la pique : à sçauoir,
en prenant en trois temps, ou trois prises, la pique en arriere par la hante,
comme cy-dessus est dit au dixiesme article : & faut repasser du pied gauche en
auant, comme l’on a fait, en presentant la pique.
Portez vos piques trainantes : ou bien, trainez vos piques.
Voulant trainer la pique, l’on laisse tomber la pointe par terre : puis on se tourne
à droicte, & l’on traine la pique de la main gauche : & se fait plus promptement,
que si l’on se tournoit du costé gauche, & que l’on trainast la pique de la
main droite, consideré que l’on perdroit vn temps.
Presentez vos piques, ou remettez-vous.
Il veut icy que l’on se remette, & que l’on represente la pique, que l’on trainoit
contre l’ennemy ; qui se fait en se tournant à la gauche en vn temps, & laissant le
pied gauche en sa place.
Mettez vos piques en terre.
C’est qu’ayant presenté la pique à l’ennemy, on la remet en terre laissant la
main gauche en sa place ; l’on prend la pique de la droicte en la haussant comme
cy-dessus auons monstré, & la met on en terre, lors l’on passe en arriere auec
le pied gauche, & auec le pied droict en auant.
Mettez vos piques contre vostre pied droict, & tirez l’espée.
C’est quand l’on va contre la Caualerie, l’on appuye la pique, à sçauoir le bout
d’icelle, à la concauité du pied droict : & passant en auant auec le gauche, le tenant
plié, lors il faut prendre la pique en vn temps en la gauche, appuyant le coude
d’icelle sur le genoüil, pour estre plus ferme ; de sorte que la pointe de la pique
ne soit plus haute de terre, qu’à la mesure du poictral, ou du col d’vn cheual ; &
ayant la main droicte libre, on la fait passer au dessus du bras gauche, pour tirer
l’espée.
Remettez-vous.
Image de la page