Mazarinade n° A_7_63
Image de la page
Anonyme [1649], VERITABLE CENSVRE DE LA LETTRE D’AVIS, ESCRITE PAR VN PROVINCIAL, A MESSIEVRS DV PARLEMENT. ET LA VERITABLE CENSVRE de la Réponse à la mesme Lettre, auec la Refutation de la Replique à ladite Réponse. OV La Critique des trois plus fameux Libelles que nous ayons veu paroistre, depuis le commencement de ces derniers Troubles, iusques à present. Par vn des plus Illustres Grammairiens de Samothrace. Domine libera animam meam à labiis iniquis, & à lingua dolosa. Psalm. 119. , français, latinRéférence RIM : M0_3924. Cote locale : A_7_63.
Ils auront beau s’armer de l’Empire du monde,
Et d’vne vanité, qui n’a point de seconde,
Trancher des Souuerains, & brauer nostre sort :
Dieu leur fera sçauoir, par vne guerre ouuerte,
Qu’il n’est rien icy bas, qui ne tente à leur perte,
Ou bien qui ne conspire à leur donner la mort.
Que n’a t’il pas fait en faueur de ceux qui l’ont prié d’vn grand
zele ? Les miracles en sont si frequens, & si connus de toutes les Nations
de la terre, qu’il n’est pas besoin d’amplifier ce petit discours de
leurs exemples. Il faudroit estre tout à fait stupide, ou meschant iusqu’à
la rage, pour ne vouloir pas adiouster quelque espece de foy aux
Decrets d’vne parole inuiolable.
Mais, Monsieur le nouueau Politique, vous passez insensiblement
de certaines questions où ie ne faisois que me diuertir en des questions
de conscience. Vous ne voulez pas que le Roy soit Maistre de
nos biens & de nos vies : & vous voulez qu’il y ait vne grande difference
entre deux propositions que vous faites, qui sont, sçauoir si le
Prince peut prendre l’vn & l’autre, pour en disposer à sa fantaisie, ou
si nous deuons employer tous les deux pour son seruice. La premiere,
dites vous, suppose vne puissance despotique & seigneuriale, & la
seconde vne suiettion dans le sujet, qui l’oblige à seruir son Prince
au despens de son sang, & de ses biens, quand la necessité est grande.
Iamais la France n’a esté en gouuernement despotique, si ce n’est depuis
trente ans, que nous auons esté sousmis à la misericorde des Ministres,
& exposez à leur tyrannie, & que la France est vne pure Monarchie
Royale, où le Prince est obligé de se conformer aux Loix de
Dieu, & où son Peuple obeïssant aux siennes, demeure dans la liberté
naturelle, & dans la proprieté de ses biens. En suite, vous rapportez
vne grande partie de l’Histoire, pour monstrer que la France n’est
pas vne terre de conqueste, ainsi que l’Empire du grand Turc, dont
le Seigneur s’est fait Maistre par la voye des armes, & qui peut pour
cela mander à ses Bassas de luy apporter leurs testes sans leur faire iniustice,
ayant tousiours retenu le pouuoir de Conquerant, qui donne,
suiuant le droit des gens, la puissance de traitter ses Subjets comme
des Esclaues.
Et moy, ie réponds à tout cela, Monsieur, que bien que la France
ne soit pas vn pays de conqueste, ny vne Monarchie despotique, &
que nos anciens Gaulois se soient librement sousmis à la domination
de Meroüée, sans coup ferir, & qu’ils ayent eu la temerité de chasser
Image de la page