[retour à un affichage normal]

Mazarinade n° C_9_56

Image de la page

Anonyme [1649], REMONTRANCE DV BERGER DE LA GRANDE MONTAGNE FAITE A LA REYNE REGENTE A COMPIEGNE Pour le retour de leurs Majestés à Paris. , françaisRéférence RIM : M0_3314. Cote locale : C_9_56.

diuin pouuoir par les plus chetiues creatures de
la nature, il n’a point pris de Princes pour estre
les apuis de son Euangile, ny les lumieres de
son regne, au contraire il veut que ces Majestés
qui font trembler tout par les decrets de leur
puissance, flechissent les genoux deuant ceux
qu’il a pris d’vne condition raualée ; pour les
faire monter dans la cognoissance de ses secrets :
Le Seigneur continuë encore par son immutabilité,
& se fait entendre sur le somet des Montagnes
comme autrefois pour parler à Moyse ;
Vn Berger de saincte vie a merité cette diuine
faueur, que cette supréme essence, que les Anges
contemplent auec tremeur, se familiarise
auec son innocence pour la consolation de nos
miseres ; Que chacun louë sa bonté & sa misericorde,
vous toutes les œuures du Seigneur, benissés-le
& l’exaltés, loüés le en ces puissances,
loués-en son excellence grandeur ; c’est icy ou
toute la terre doit admirer & adorer vn Dieu si
bon, qui a pris pitié de nos peines, & nous en
promet alegement & priuation ; il parle à nous
en la personne de se deuot Pasteur, il nous asseure
de la paix generale dedans & dehors le
Royaume, à condition que nos pechés ne luy
fassent plus la guerre ; les frequentes Communions
de nostre Reyne attirent ces graces &
benedictions sur tout son peuple, & sa Majesté