Mazarinade n° C_9_45
Image de la page
Anonyme [1649], REMONSTRANCES A LA REYNE REGENTE, SVR LE GOVVERNEMENT DE L’ESTAT. , françaisRéférence RIM : M0_3334. Cote locale : C_9_45.
s’esleuera quelque iour pour la combattre & pour l’aneantir : Et si Dieu n’a
point plus de compassion pour vous que vous n’en auez auiourd’huy pour vos
peuples ses seruiteurs.
A qui, ie vous prie MADAME, vostre Maiesté se doit elle laisser persuader,
ou à la douceur, ou à la violence : à l’impieté, ou à la vertu : aux vsures, aux
concussions, ou à la Iustice qui les punit, & qui en arreste le cours : aux
esprits qui allument la guerre dans le sein du Royaume, ou à ses Genies
fauorables qui l’y veulent estouffer, & porter le succés de leurs combats au
de là des bornes de l’Estat, afin de reduire ses ennemis dans les loix d’vne
guerre qui vous enfanteroit vne paix tres-aduantageuse.
Ne souffrez plus que l’on vous persuade que ceux qui n’estudient & qui ne
veillent qu’à maintenir les loix fondamentalles de l’Estat, & à empescher les
vsurpations de quantité d’interessez ayent dessein de diminuer vostre pouuoir,
& qu’ils vueillent contraindre vne main, qu’ils reconnoissent tres-absoluë
dans le partage de ses graces & de ses bien-faits.
Souuenez vous, MADAME, que quantité de personnes empruntent le
nom de l’authorité du Roy, comme les Demons prennent le nom de Dieu, &
se reuestent de l’apparence des Anges de lumiere pour faire des miracles & des
actions extraordinaires, & qui en verité ne sont que des tromperies, des illusions
& des phantosmes ; Ainsi ces malheureux se seruent de la puissance & du
nom du Roy, comme d’vn voile dont ils se couurent pour establir plus aisément
leurs fortunes. Ces pretextes specieux d’appuyer l’authorité Royalle ne
sont que de foibles apparences, que des chimeres de respect, & des illusions
d’honneur, qui n’ont autre fondement ne autre fin que leurs interests & leur
ambition ; Voyez, examinez & iugez, ie vous prie par vous mesme des biens
& des maux de l’Estat ; descouurez en les besoins, faites vous faire vn recit fidel
de toutes les necessitez qu’il souffre ; consultez le Ciel, demandez à Dieu l’esprit
& les lumieres necessaires pour donner la paix à vos Subjets, & conseruer auec
soin le precieux depost que Dieu vous a confié : Trauaillez en Reyne, mais en
Reyne veritablement Regente à restablir le Royaume dans son premier lustre,
à y restablir les vertus, & en éloigner l’impieté, y aneantir les desordres, y supprimer
l’ambition, & à y seconder la pieté à faire honorer Dieu d’vne extremité
à vne autre, & inspirer à tous les peuples par tant d’illustres exemples, de
zele & de saincteté, l’estime, la reuerence & le respect, qu’ils sont obligez d’auoir,
& de conseruer pour vne Princesse qu’ils verront ne se plus conduire que
par les mouuemens de Dieu, que par les lumieres de ses graces, & dans les regles
d’vne bonne conscience ennemie de la complaisance & de la flaterie : Faisant
voir qu’elle n’a point d’autre veuë que la gloire de Dieu, plus autre pensée
que l’aduantage du Royaume, & le bon-heur du Roy son Fils, afin d’establir
vne tranquillité si vniuerselle, & donner vn repos si constant à vous ses peuples
qu’ils s’aduoüent pour iamais obligez de reconnoistre les bien-faits signalez
d’vne Regence par des prieres sans fin & par des veux eternels.
Image de la page