[retour à un affichage normal]

Mazarinade n° B_2_1

Image de la page

Anonyme [1652], REMONSTRANCE AV ROY POVR LE PARLEMENT DE THOLOZE : TOVCHANT L’AVTHORITÉ DES PARLEMENTS. , françaisRéférence RIM : M0_3296. Cote locale : B_2_1.

les Estats où l’autorité des Roys est foible & mal asseurée,
il luy sera aisé de recognoistre que ce ne sont pas
ceux ou les Officiers du Prince sont fort respectez, ou
en grand nombre, que ce sont plustost ceux où le pouuoir
des grands, & les orages des seditions populaires,
ne rencontrent point cét obstacle. Que si ce qu’on commande
de la part du Prince bien souuent sans son sçeu
& contre son autorité, n’est pas tousiours receu auec
promptitude par vos Parlemens ; si par fois de peur de
pecher contre vostre seruice ils different à vous rendre
obeissance, & si pour cette raison le Parlement de Tolose
n’a pas creu deuoir obeyr d’abord à quelques Arrests
de vostre Conseil, donnez par surprise, sur simple
requeste, contre vostre derniere Declaration du mois
d’Octobre, & contre le bien de vostre seruice ; Il ne
croit pas, SIRE, auoir rien fait en cela que vostre equité
ne luy permette, & que mesme le zele de vostre
gloire ne luy demande : Les Roys sont absolus, & tout
puissans dans leurs Estats, c’est vne verité qui ne peut
pas estre reuoquée en doute, ils sont au dessus des loix,
mais ils ayment mieux qu’on die qu’ils sont au dessus de
leurs passions ; Ils sçauent que s’il est glorieux de pouuoir
faire les choses iniustes, il est encore plus glorieux
de n’vser point de cette puissance, ils temperent eux
mesmes ce commandement absolu dont ils peuuent se
seruir, afin que leur Empire soit plus ferme & plus durable.
Et veritablement ils ne se trompent point en cela,
car il n’y a esprit si rebelle qui ne reuere vne force
qui fait regner la raison, & chacun regarde auec amour
vne autorité qui ne s’esleue au dessus de luy que pour le
couurir & pour le defendre. Quand tout cela ne seroit
pas veritable, il nous suffiroit de vous dire que le Parlement
de Tolose n’a refusé de receuoir quelques Arrests
de vôtre Conseil que pour vous conseruer l’auto.