[retour à un affichage normal]

Mazarinade n° B_7_33

Image de la page

Anonyme [1652 [?]], RELATION VERITABLE De ce qui se passa le Mardy deuxiéme de Iuillet, au Combat donné au Fauxbourg saint Anthoine, entre les Trouppes du C. M. commandées par les Mareschaux de Turennes & de la Ferté, & celles de Monsieur le Duc d’Orleans & de Monsieur le Prince. , françaisRéférence RIM : M0_3232. Cote locale : B_7_33.

quantité de coups sur sa cuirasse, & comme il estoit
pied à terre rudement attaqué par les ennemis, &
en danger de perdre ou la vie ou la liberté : Monsieur
le Prince vint fondre comme vn foudre sur les
ennemis, & luy donna loisir de remonter à cheual
& de se retirer, son Altesse fit faire en suitte vne
barricade auec des chariots à cinquante pas de là,
& l’on s’amusa le reste du iour à escarmoucher & à
tirer force coups de canon.
 
Le Baron de Clinchamp & le sieur de Valon
Lieutenants Generaux, qui de leur costé firent des
merueilles, & qui connoissoient du siege d’Estampes
ceux qui les attaquoient, ne les receurent pas
auec moins de vigueur dans leurs postes, & faisant
leur deuoir de sages Officiers & de braues Soldats
furent blessez, le premier d’vne mousquetade dans
le bras & legerement à la cuisse ; le second fut blessé
au costé : Toutes les troupes qui combattant sous
eux & le Comte de Tauannes, auoient fait leuer le
siege d’Estampes au Mareschal de Turennes : ne se
signalerent pas moins en le repoussant dans toutes
les attaques qu’il fit dans le Faux bourg, & témoinerẽt
par leur genereuse resistance qu’elles estoiẽt
animées par la presence d’vn prince inuincible.
Mais deuant que nous acheuions la Relation
de tout çe qui se fit hors de de la Ville, il est iuste
que le public soit instruit de se qui se passa dedans,
& que l’on sçache qu’en cette rencontre,
Paris n’a pas moins temoigné de zele pour la conseruation
de Monsieur le Prince & de ses Trouppes