[retour à un affichage normal]

Mazarinade n° A_8_50

Image de la page

Anonyme [1649], REFVTATION DE LA RESPONSE SANS IVGEMENT, AV BANDEAV DE LA IVSTICE. , français, latinRéférence RIM : M0_3068. Cote locale : A_8_50.

vous vn ouurage dont le Ciel ne vous à point
rendu capable, & que toutes les industries de
la nature ne peuuẽt perfectionner. Dites moy,
vous qui parlez de l’Histoire dans vostre response,
& qui meslez les Senateurs de Rome
auec les Empereurs qui la gouuernoiẽt, qu’elles
sont les raisons qui ont obligé les peintres
aussi bien que les graueurs à representer la Iustice
auec vn bandeau qui luy couure les yeux,
& des balances qu’elle tient dedans ses mains ;
sinon pour nous donner à cognoistre qu’ayant
les yeux bandez elle ne doit pas se laisser corrompre ;
mais si elle leue le bandeau pour voir
ceux qui la prient de commettre vne iniustice,
& si manquant aux desseins que les hommes
ont eu en la representant de la sorte ; elle vient
à se rendre coupable ; ne nous sera-il pas permis
de le dire ; n’aurons nous pas la mesme liberte
de publier ses defauts, comme de respecter
ses grandeurs : de mesme qu’il nous est permis
de blasmer les obscures eclipses du Soleil,
& d’admirer la clarté de ses rayons. Mais d’ailleurs
si la Iustice tient des balances en ses mains,
ce n’est pas seulement pour examiner les action
d’autruy, mais aussi pour peser les siennes
propres, & quand par vn desreglement de
volonté, par vn mouuement d’interest ou de
passion elle condamne les vnes pour approuuer
les autres, ne pouuons nous pas l’accuser