[retour à un affichage normal]

Mazarinade n° A_7_14

Image de la page

Anonyme [1649], QVESTION, SI LA VOIX DV PEVPLE EST LA VOIX DE DIEV ? , français, latinRéférence RIM : M0_2951. Cote locale : A_7_14.

mesme ; & ainsi il n’y a eu que le Roy qui s’y est appauury,
pendant que la France s’y est enrichie.
 
II. OBIECT.
Qu’il n’y a
point d’argent
en France.
Il faut donc considerer que depuis la mort du feu Roy nous
n’auons fait autre chose que conquerir, & nous estendre bien
loin dans les pays estrangers, dans l’Italie, dans l’Espagne, &
dans la Flandre. Nous n’auons quasi point eu de guerre sur
nos frontieres, mais dans le cœur du pays ennemy : Et ainsi
tout l’argent qui y est allé, n’en est point reuenu, mais s’est
distribué parmy les estrangers. Il en a fallu vne quantité
espouuantable en Catalogne particulierement, où les François
ne peuuent rien prendre sans payer ; & en Italie aussi, où il
a sans doute plus cousté en Soldats & en Pensionnaires, que du
temps du Cardinal de Richelieu : à cause que nous auons porté
la guerre dans son sein, & par l’acquisition de deux places
importantes que nous y auons prises, & d’vne armée nauale
qui y a tousiours tenu la mer, nous auons mis toute l’Italie en
bransle, & auons esté pres d’y faire vn party aussi fort que celuy
d’Espagne. Chose que le Cardinal de Richelieu n’auoit
iamais cruë possible, & qui y a imprimé vne aussi grande terreur
du nom François, que du temps de Charles VIII. & de
Loüis XII. au lieu qu’au parauant à peine entendoit-on parler
de nous, comme dit vn Historien des peuples de delà l’Elbe,
dont c’estoit tout ce qu’on pouuoit faire à Rome que de sçauoir
le nom. Il a fallu outre cela pour les grands efforts qu’on
a fait faire à nos Alliez, redoubler les subsides, & leur donner
souuent des extraordinaires, ce qui n’estoit pas si necessaire
que du temps du feu Roy. C’est pourquoy il ne se faut pas
estonner que dans tous ces frais excessifs que la Reyne a esté
obligée de faire à son aduenemẽt à la Regẽce, où elle a trouué
le Roy son fils endebté, & tout son domaine aliené ; elle n’ayt
pas amassé de thresors : Puis que la feüe Reyne-Mere qui en
auoit trouué que Henry IV. luy auoit laissez, & qui n’auoit
point de guerre sur les bras, ne laissa pas de les dissiper, pour
contenter les Princes, qui n’est qu’vne sorte de despense entre
mille dont nostre Regente est chargée, encore qu’elle monte
beaucoup plus haut à present qu’elle ne faisoit en ce tẽps-là.
III. OBIECT.
Que la Paix
n’est point
faite.
Ie ne mets point icy en question, s’il n’est pas plus auantageux
à vn Estat florissant, & plein d’hommes naturellement