[retour à un affichage normal]

Mazarinade n° A_7_14

Image de la page

Anonyme [1649], QVESTION, SI LA VOIX DV PEVPLE EST LA VOIX DE DIEV ? , français, latinRéférence RIM : M0_2951. Cote locale : A_7_14.

d’Espagne, & se remissent sous la domination de France, qui
l’y auroit pû establir ou Vice-Roy ou Vicaire, qui est vne qualité
assez commune en Italie ? Moyennant quoy il auroit pû
donner des Principautez à ses parens, s’il est vray qu’il ne cherche
que cela, & disposer entierement de ces deux grands
Estats, à cause de leur esloignement, & de sa faueur.
 
I. OBIECT &,
Que le Card.
Mazarin a
intelligence
auec l’Espagne.
Il est donc ridicule d’alleguer ces reuoltes non seulement
de Naples & de Sicile, mais du Milanois, qui auoient esté
mesnagées depuis si long temps auec tant de soin & d’adresse,
& qui n’ont manqué de reüssir, que par vne pure permission
de Dieu, qui nous a donné, comme à la mer, des bornes que
nous n’auons sceu passer. Comme il est injuste pareillement de
compter quelques autres petits malheurs qui nous sont arriuez
depuis que ses ordres ne sont pas si ponctuellement suiuis,
& que l’obeïssance s’est vn peu relaschée ; & de ne pas compter
le nombre des batailles & des places gagnées pendant son administration.
Et ie ne sçay pas comment ces grands Politiques
recognoissant qu’il a intelligence auec les Espagnols, se veulent
si hautement declarer ses ennemis, pendant qu’ils s’allient
tout ouuertement auec eux : Estant, ce me semble, selon les
regles de la bonne foy, d’auoir mesmes amis & mesmes ennemis
que ceux auec qui on s’allie ; & selon les regles de la prudence,
de ne pas descouurir à l’amy de son ennemy le dessein
qu’on a de le perdre.
La seconde chose qu’on luy objecte, c’est qu’il n’y a point
d’argent en France. Il est certain qu’il y en doit auoir beaucoup
moins que du temps du Cardinal de Richelieu, sans qu’il
soit besoin que Monsieur le Cardinal Mazarin en ait enuoyé
des flottes en Italie, & des charettes à Sedan. La premiere année
de la Regence est, à ce que quelques vns ont dit, vn abysme
de Comptans où les Financiers ne voyent goutte. Et ce n’est
pas merueille si la Reyne, qui ne s’estoit point encore veüe en
estat de faire du bien à personne, se laissa d’abord aller à ce
plaisir genereux & vrayemẽt Royal, de satisfaire à son humeur
liberale, & de recompenser les seruices de ceux qui luy auoient
esté fideles. Ce n’a pas esté là l’argent le plus mal employé ; &
c’est peut-estre ce qui luy a attiré tous les bonheurs qu’elle a
eus en suite. Car cet abysme où il s’est perdu, ç’a esté la France