[retour à un affichage normal]

Mazarinade n° C_6_76

Image de la page

Anonyme [1649], QVESTION, SI LA VOIX DV PEVPLE EST LA VOIX DE DIEV ? , français, latinRéférence RIM : M0_2951. Cote locale : C_6_76.

portez à la guerre, d’en entretenir vne estrãgere, par le moyen
de laquelle il se descharge de mille mauuaises humeurs dont
il est impossible qu’il n’abonde, & employe contre autruy des
forces, qu’autrement il tourneroit contre soy-mesme ; Pourquoy
les grands Politiques soustiennent tous, qu’vn grand
Prince doit estre tousiours armé : Que de languir dans l’oisiueté,
& dans le luxe, qui causent des desordres plus grands,
& des despenses plus déreglées que celles qu’on veut éuiter
par la paix, & où il n’y a point de matiere à la vertu heroïque.
Ie suppose que la paix dans vne Regence mesme est plus auantageuse
à la France, qu’vne guerre éloignée, dont elle n’auoit
rien apperceu iusques icy que par les Gazettes, & par les Tedeums,
& dont elle ne ressentoit aucune incommodité, que
celle de donner de l’argent pour la faire : pendant que les païs
où elle la portoit, n’auoient pas seulement cette incommodité
bien plus pesante encore qu’elle, mais auoient aussi pardessus
celle de nourrir nos armées, aussi bien que les leurs.
Dont elle doit auoir esprouué la difference dans le peu de
temps de guerre ciuile où elle a esté embarrassée, qui l’a plus
desolée mille fois, que dix ans de celle dont elle se plaignoit.
 
Mais à qui a-t’il tenu que la paix ne s’est point faite ? Toute
la terre n’a-t’elle pas veu que dés le commencement de l’Assemblée
de Munster les Espagnols n’ont rien fait que tirer les
choses en longueur ? Et la declaration qu’ils font à present de
ne point vouloir entendre à la paix, que tout ce qui y a esté fait,
ne soit declaré nul, n’est-ce pas vne marque certaine qu’ils
n’ont iamais eu enuie d’y rien faire ? ou du moins qu’ils n’ont
iamais eu dessein de tenir ce qu’ils y auroient fait quelque solennellement
que ce fust ? Ie ne sçay comment Messieurs le
Nonce du Pape, & l’Ambassadeur de Venise peuuent porter
de telles paroles sans quelque confusion ; puis que cela ne
peut tourner qu’au mespris du S. Siege, & de l’Auguste Republique,
qui ont moyenné l’ajustement de tous les articles,
dont l’on y est conuenu, & qui en sont par consequent les garands :
& ie ne voy pas quelle asseurance on peut auoir que ce
qu’on traitteroit à cette heure auec eux seroit obserué : puis
qu’ils n’auroient pas apres cela plus de raisons de ne s’en pas
releuer, qu’ils en ont à present.