Mazarinade n° C_6_76
Image de la page
Anonyme [1649], QVESTION, SI LA VOIX DV PEVPLE EST LA VOIX DE DIEV ? , français, latinRéférence RIM : M0_2951. Cote locale : C_6_76.
auoit donné. Dauid, que le Prophete auoit desia fait Roy en
luy versant l’huile sacrée dessus la teste, & qui sçauoit que Saül
auoit encouru la disgrace de Dieu, se resolut de souffrir plutost
toutes les miseres imaginables, que de leuer les armes
contre luy. Il souffrit la faim auec patience, iusques-là qu’il
fut obligé chez le Prophete Achimelech, de manger des pains
de Proposition à faute d’autres, & contint tous ceux qui vindrent
se ioindre à luy dans le deuoir. Il ne fit pas comme les
mescontens de nostre siecle : car sçachant que Saül alloit ruiner
la ville de Ceilam où il estoit enfermé, il aima mieux en
sortir, que d’attirer l’indignation du Prince sur cette ville, &
se mit à fuir de desert en desert, & de nation en nation, de deuant
la face de Saül, iusqu’à ce qu’en fin on luy apporta la
nouuelle de sa mort ; surquoy déchirant ses vestemens, il fit
mourir celuy qui auoit eu l’impieré de seruir de ministre au
desespoir de ce Prince, luy disant ; Comment n’as-tu point
tremblé de mettre la main sur l’Oingt du Seigneur ?
1. Reg. 13
2. Reg[1 chiffre ill.].
Cette histoire est bien vne pierre de touche veritable, dont
l’on peut esprouuer la sousmission & la fidelité que les peuples
doiuent auoir pour leurs Princes, quand mesme ils en seroient
persecutez ; & monstre bien par l’approbation qu’elle a dans
l’Escriture que c’est l’exemple de cet homme, qui estoit selon
le cœur de Dieu, qu’il faut se proposer, & qu’il faut suiure.
La rebellion ne sçauroit non plus s’authoriser par le pretexte
du soulagement des peuples ; Il n’y en a iamais eu de si injuste
qui ne l’ait pris. Les deux Gracques, tous deux fort honnestes
gens, & fort habiles, commencerent, sans y penser, la ruine de
la Republique de Rome, par la loy qu’ils firent, pour faire
restituer aux pauures des terres qui leur auoient esté destinées
pour peu d’argent qu’ils deuoient donner à la ville, sur lesquelles
les riches auoient mis l’enchere, & en auoient ainsi depossedé
les pauures. Edict qui estoit raisonnable en soy, & approuué
de Lælius, de Scipion, & des plus sages de ce temps-là :
Mais cela leur acquit vne telle bien veillance parmy le peuple,
& vne si grande haine parmy les grands, que la ville commença
dés lors à se deschirer en deux partis ; iusqu’à ce qu’apres les
guerres ciuiles de Catilina, qui n’auoit pas des desseins si moderez
qu’eux, de Marius, de Sertorius, & des autres : En fin
Image de la page