Mazarinade n° B_11_23
Image de la page
Anonyme [1652], OBSERVATIONS VERITABLES ET DES-INTERESSEES, Sur vn escrit imprimé au Louure, INTITVLÉ LES SENTIMENS D’VN FIDELLE SVIET DV ROY, Contre l’Arrest du Parlement du 29. Decembre 1651. Par lesquelles l’authorité du Parlement, & la Iustice de son Arrest contre le Mazarin, est plainement deffenduë; & l’imposteur qui le condamne entierement refuté. Par vn bon Ecclesiastique tres-fidelle sujet du Roy. PREMIERE PARTIE. Qui iustificat impium, & qui condemnat iustum; abominabilis est vterque apud Deum; Prouerb. cap. 17. vers. 15. , français, latinRéférence RIM : M0_2574. Cote locale : B_11_23.
afin de vous contenter en cela, nous auons les remedes tout
presens dans nos Libertez de l’Eglise Gallicane, dans nos appels
comme d’abus, & dans nos Parlemens qui sçauent reprimer &
chastier comme perturbateurs du repos public ceux qui s’oublient
& qui sont temeraires comme vous. S’ils ayment leur
honneur, & s’ils font leur deuoir, ils desaduouëront vostre Mazarin,
comme ils firent dans leurs remonstrances au Roy & à la
Reyne Regente, touchant l’emprisonnement de Monsieur le
Prince de Conty ; ils le retrancheront de leur Corps comme vn
membre pourry, & vne Brebis galeuse, suiuant le precepte
Euangelique, & s’il ne vint à resipiscence, fulmineront leurs
anathemes plus iustement que vous ne leur conseillez, contre
cet ennemy des peuples, ce perturbateur du repos public, cet
opprobre de l’Eglise, & ce receptacle de tous les crimes dont
vn maudit de Dieu peut estre remply & composé.
Vous auriez bien meilleur grace d’implorer les prieres de ces
Euesques pour la conuersion de vostre pecheur endurcy, &
pour le soulagement du pauure peuple qu’il opprime depuis
tant de temps, que de les exhorter à la sedition, & à se ranger
du costé des coupables, pour lancer leurs excommunications
sur les Iuges qui le condamnent, & sur les gens de bien qu’il afflige
auec tant de Tyrannie. Il faut que vous soyez, ou bien foible,
ou bien deuot, puis que vous n’appellez plus à vostre ayde,
que des Prelats qui ne vous sçauroient assister que de leurs vœux
& de leurs prieres pour vous accorder ce qu’ils doiuent, & vous
donner ce dont vous auez besoin. Ie les en coniure auec vous,
& de les redoubler par tous leurs Dioceses, pour la santé &
prosperité de sa Maiesté, pour le repos & la tranquillité de son
Estat, & pour l’extirpation des esprits malins & corrompus, qui
obsedent & qui ternissent l’innocence & la vertu de nostre jeune
Monarque.
Pyrrhus cum Copiis Italia excedito, vbi excesserit de pace
si volet agito, ni excesserit, arma, & viros, & aciem
expectato. Dionis. Halicar. lib. 8. Et Plutarque
en la vie de Pyrrhus.
FIN.
Image de la page