[retour à un affichage normal]

Mazarinade n° B_11_23

Image de la page

Anonyme [1652], OBSERVATIONS VERITABLES ET DES-INTERESSEES, Sur vn escrit imprimé au Louure, INTITVLÉ LES SENTIMENS D’VN FIDELLE SVIET DV ROY, Contre l’Arrest du Parlement du 29. Decembre 1651. Par lesquelles l’authorité du Parlement, & la Iustice de son Arrest contre le Mazarin, est plainement deffenduë; & l’imposteur qui le condamne entierement refuté. Par vn bon Ecclesiastique tres-fidelle sujet du Roy. PREMIERE PARTIE. Qui iustificat impium, & qui condemnat iustum; abominabilis est vterque apud Deum; Prouerb. cap. 17. vers. 15. , français, latinRéférence RIM : M0_2574. Cote locale : B_11_23.

l’abandonner, mais encore de le chastier en faisant executer la
Declaration du Roy, qui le chasse de ses Conseils, & qui le
bannit de ses Estats sans espoir d’y pouuoir iamais rentrer.
 
Si apres tant de condamnations, & tant de connoissances
qu’ils ont des crimes & du mauuais gouuernement de ce perfide
qu’ils doiuent connoistre mieux que personne, ils venoient encore
à le proteger contre la volonté du Roy, le bien de son Estat,
leurs propres Conseils, les Arrests de tous les Parlemens, &
contre les vœux & les prieres de toute la France ; que deuiendroit
leur honneur & leur reputation ? Quel estime pourroit-on
faire de leur probité & de leur vertu ? Quel amour, & quelle
affection pourroient-ils desirer des peuples en les abandonnant
de la sorte ? Qui vangeroit l’emprisonnement rigoureux
de Monsieur le Prince, & qui empescheroit le second que ce
Tyran luy prepare s’il peut le surprendre encore vne fois ? C’est
pourquoy mieux conseillez & plus instruits des maluersations,
& des mauuais desseins de cet ingrat qui ayant emprisonné l’vn,
faisoit tout sans l’autre ; sans vser de la vengeance, & du pouuoir
qu’ils ont en main pour rabattre l’insolence d’vn petit
Italien qui les gourmande & qui leur fait la loy ; ils laissent faire
la iustice, & s’acquittans de leur deuoir, ils se rangent de son
party pour ne pas proteger dauantage vn meschant & vn temeraire
qui n’a rien de recommandable que sa qualité de Cardinal,
làquelle estant en luy vn present de la fortune, & non pas vne
recompence de la vertu, est vn ornement deshonoré par celuy
qui en est reuestu ; comme a tres-bien representé le Parlement
de Paris dans ses remonstrances par escrit, mises entre les mains
du Roy à Sully.
De plus les Conseils d’Estat ne se connoissans bien que par les
euenemens, ces deux soustiens de la Couronne voyans qu’vn
plus long sejour & vne plus grande tolerance du Mazarin, ne
faisoient qu’aigrir les maux, & redoubler les miseres du Royaume ;
ils ont crû, & tres-prudemment resolu, qu’il valoit mieux
s’en deffaire au commencement d’vn nouueau Regne, & à la
fin d’vne Regence, que d’attendre qu’il ait peruerty & corrompu
l’esprit d’vn jeune Roy, comme il a fait celuy d’vne bonne
Reyne.
Quand ce mesme autheur employe toutes ses couleurs pour