[retour à un affichage normal]

Mazarinade n° B_11_23

Image de la page

Anonyme [1652], OBSERVATIONS VERITABLES ET DES-INTERESSEES, Sur vn escrit imprimé au Louure, INTITVLÉ LES SENTIMENS D’VN FIDELLE SVIET DV ROY, Contre l’Arrest du Parlement du 29. Decembre 1651. Par lesquelles l’authorité du Parlement, & la Iustice de son Arrest contre le Mazarin, est plainement deffenduë; & l’imposteur qui le condamne entierement refuté. Par vn bon Ecclesiastique tres-fidelle sujet du Roy. PREMIERE PARTIE. Qui iustificat impium, & qui condemnat iustum; abominabilis est vterque apud Deum; Prouerb. cap. 17. vers. 15. , français, latinRéférence RIM : M0_2574. Cote locale : B_11_23.

auarice insatiable, & enrichir leurs valets, & leurs maigres parens
au poinct prodigieux où nous les voyons, à la honte & à la
confusion de tant de gens de bien & d’honneur qu’on laisse
abbatre & mespriser pour metamorphoser en vne nuict des petits
Bourgeois ou des pauures Cadets, en Princes, en Ducs &
Pairs, en Officiers de la Couronne, en Gouuerneurs de Prouinces,
& en Seigneurs de sept & huict cens mille liures de
rente, tirées du sang & de la sueur de sept ou huit cent mille
bons sujets qu’il faut mettre à la besace, & faire coucher dans
les ruës & dans les escuries, pour loger ces voleurs publics, &
ces sangsuës du peuple dans des palais dorés qui font honte à
nos Eglises, & faire manger leurs palfreniers & leurs marmittons
dedans de la vaisselle d’or & d’argent qui meubleroit toute
vne ville.
 
Si Messieurs du Parlement sont à blasmer pour ce qui est de
leurs gages & de leurs appoinctemens, c’est de se contenter
comme ils font du peu qu’ils en ont, & de souffrir que des partisans
& des maltotiers leur retiennent tous les ans pour festiner
& dormir la grasse matinée auec les femmes & les filles de
condition qu’ils desbauchent & qu’ils entretiennent auec tant
de profusion ; pendant que ces bons Senateurs quittent leurs
femmes & leurs enfans pour venir au Palais deuant le iour, &
qu’ils negligent leurs propres affaires pour trauailler à celles
de ceux qui leur demandent iustice, & qui n’ont autre bien que
celuy qu’ils leur conseruent. Ceux qui sçauront ce que c’est
du Parlement que vous accusez auec tant d’iniures, connoistront
assez que les Conseillers qui le composent n’acheptent
point leurs charges, ny pour les gages, ny pour les profits qui
en reuiennent, mais seulement pour auoir occasion de seruir le
Roy, & de soulager son peuple & ses suiets en les protegeans
contre les Ministres qui en sont les ennemis declarez, & en
leur faisant Iustice contre les Partisans. Le moindre valet du
Mazarin gaigne plus en trois mois, que le plus employé de tous
ces Messieurs en dix ans ; & s’il faut chercher des thresors on
en trouuera plus chez le dernier de cinq cens mal-totiers
qui sont assez connus, que chez tout le Parlement ensemble,
où il n’y pas vn Conseiller qui ne soit plus pauure &
plus incommodé, que lors qu’il achepta sa charge, ce qui ne se