[retour à un affichage normal]

Mazarinade n° B_11_23

Image de la page

Anonyme [1652], OBSERVATIONS VERITABLES ET DES-INTERESSEES, Sur vn escrit imprimé au Louure, INTITVLÉ LES SENTIMENS D’VN FIDELLE SVIET DV ROY, Contre l’Arrest du Parlement du 29. Decembre 1651. Par lesquelles l’authorité du Parlement, & la Iustice de son Arrest contre le Mazarin, est plainement deffenduë; & l’imposteur qui le condamne entierement refuté. Par vn bon Ecclesiastique tres-fidelle sujet du Roy. PREMIERE PARTIE. Qui iustificat impium, & qui condemnat iustum; abominabilis est vterque apud Deum; Prouerb. cap. 17. vers. 15. , français, latinRéférence RIM : M0_2574. Cote locale : B_11_23.

que l’vn & l’autre auoit faussé sa promesse quant à la cession de
leurs pretensions ; Et cependant on fit faire amende honorable
aux Nonces de Benoist qui auoient publié les Bulles de l’interdit
du Royaume, & furent declarés traistres & desloyaux & au
Roy, & à l’Eglise, & les Bulles deschirées & bruslées publiquement ;
& les Armoiries de Pierre de Lune Anti-Pape renuersées,
comme s’il eut esté de gradé de Noblesse à cause de ses parjures
& mauuaises actions.
 
Libertez de
l’Eglise Gall.
tom. 2. fol.
483.
Sponde annal.
tom. 2.
ann. 1408.
num. 1.
Apres tous ces exemples particuliers, il semble que ce soit
bien flatter l’humanité des Papes que de vouloir persuader à
toute sorte d’esprits, qu’ils soient Iuges Souuerains en leurs
propres causes. L’Escriture Sainte n’en dit mot, tous les Theologiens
n’en demeurent pas d’accord, l’vsage semble tesmoigner
le contraire, ie sçais ce que les Canonistes en disent, &
ce que les Moines en preschent ; C’est pourquoy laissant la liberté
des opinions là dessus, disons seulement que le Cordelier
Ocham ne peut estre blasmé que de trop de verité quand il
dit, que ; Imperator est judex Papæ, & Papa est inferior illo quoad jurisdictionem
coactiuam ; Aaron, Moysem pro Domino agnouit ; dit
Optatus Mileuitanus.
Ocham.
Optat. Mileuit. CARDINAVX ET LEGATS
ausquels on a fait le procés.
SI les Papes ont reconnu la Iurisdiction temporelle des
Souuerains de la terre, les Cardinaux qui ne sont ny
Chefs, ny parties de la veritable Hierarchie de l’Eglise,
mais seulement les obiets de son faste & de son ambition, auroient
bien mauuaise grace & beaucoup de presomption de
vouloir s’en exempter, & ce seulement parce qu’ils sont plus
fragiles, & plus suiets à correction que pas vn autre de la robbe,
comme l’histoire de leurs vies, & de leurs actions nous tesmoigne.
Le droit est contre eux, la raison les condamne, &
la pratique fait voir que les bons Magistrats ne les espargnent
point, quand ils des-honorent leur pourpre, & qu’ils troublent
l’Estat.