Mazarinade n° A_6_2
Image de la page
Anonyme [1649], MOYENS FACILES ET NECESSAIRES pour la garde, seureté & Police de la Ville & Faux-bourgs de Paris: La leuée & subsistance de ses Troupes: Et ouuerture de ses passages tant par eaüe que par terre. , françaisRéférence RIM : M0_2516. Cote locale : A_6_2.
en voudroient achepter à si bas prix n’y seroient plus receus, & cela deuroit
estre ordonné & publié, afin qu’vn chacun le sceust.
L’on peut encore auoir vn prompt secours de la bource des plus riches
& accommodez par forme de prest & aduance, sous l’obligation des
Preuost des Marchands & Escheuins, attendant vn fonds suffisant pour
leur remboursement.
Enfin la necessité publique, peut obliger les Communautez Ecclesiastiques
Seculieres & Regulieres, les Beneficiers qui sont riches & opulans,
& les Oeuures & Fabriques des Eglises Parochiales, de contribuer
certaines sommes de deniers, par la consideration de l’interest commun,
& de la Iustice de nostre deffense.
Quant à l’abondance des viures, plusieurs choses sont necessaires, car
d’vne part, il faut commencer d’ouurir les passages à main armée, si puissamment,
que les ennemis ne le puissent empescher, & les forces de Paris
sont tres-grandes, si l’on en sçait bien vser.
En second lieu, l’on doit auoir en tous les quartiers de la Ville des greniers
publics, des Conuois que l’on fera, afin que le tout soit bien & deuëment
distribué à iuste prix, sans passer par les mains des Regrattiers &
Reuandeurs, ny se sousmettre à l’auidité des Boulangers, lesquels n’ont
aucune autre reigle que celle de leur interest, & de se préualoir méchamment
de la misere du temps.
En troisiesme lieu, vayans plusieurs particuliers, lesquels par vn excez
de malice & de complicité auec les ennemis, ont fait en cette Ville des
grands amas de bled, vne visite generale est necessaire, & les bleds qui seront
trouuez entre leurs mains, doiuent estre portez dans les Magazins
publics, & distribuez comme dessus.
En quatriesme lieu, puisque les chefs de plusieurs familles suiuent le
Party ennemy, du nombre desquels sont diuers Partisans & gens d’affaires,
il est tres iuste & necessaire de leur renuoyer toute leur famille, & employer
pour les necessitez publiques toutes les prouisions de bouche
qu’ils ont en leurs maisons, scituées en cette Ville & Faux-bourgs de
Paris.
Enfin l’on doit suiure ce qui s’obserue d’ordinaire dans les Villes populeuses
qui sont assiegées ou inuesties, faire sortir de la Ville tous les faineans
& gẽs sans adueu, & tous les caymans & mandians valides dõt il y a
vn tres grand nombre, par vn abus intolerable, procedant de ce qu’il n’y
a aucune Police actuelle en cette Ville, & cependant cette sorte de gens
vit d’ordinaire dans toute sorte de vices, ce qui attire sur la Ville l’ire & la
vengeance Diuine, outre les autres crimes qui y abondent, ausquels il
faut aussi pourueoir par vne seuerité toute entiere, afin que Dieu nous
soit propice.
Image de la page