[retour à un affichage normal]

Mazarinade n° A_6_28

Image de la page

Anonyme [1649], MAZARIN EN SOVPCON DE SA VIE ET DE SES MOEVRS. , françaisRéférence RIM : M0_2433. Cote locale : A_6_28.

de Richelieu auec toute sa superbe & sa puissance
n’auoit osé choquer. Que ce commencement fut de
mauuais augure à la France, & si l’on eust consideré
à l’heure que sa premiere violence se portoit contre la
maison des Princes, n’eussions-nous pas eu raison de
conclure que pour continuer dedans ses crimes & les
agrandir il eust fallu qu’il nous rauist la sacrée personne
de nostre Roy ? Que ces procedez sont estonnans,
& que le bonheur est insigne qui accompagne des crimes
où il y a tant de hardiesse & si peu d’apparence
à la reussité. Les plus sçauans politiques imitent la nature
qui se conduit auec succession, & du petit au grand
dans ses ouurages. Les peintres crayonnent vn tableau
auparauant que d’y appliquer les couleurs, & les plus
fameux en crimes font des fautes auparauant que des
pechez. L’esprit s’acoustume à vn moindre mal pour
en faire en suite vn execrable. L’ame seule de Mazarin
feconde en crimes contre l’ordre qui se trouue dedans
toute la nature contre la science des Politiques sans se
mettre en peine de se faire connoistre par les exils
par l’oppression & par la ruine des particuliers ; de
de prime abord il s’attaque à la maison de nos Princes,
& auide du sang de nos Roys nous enleue ce Roy
que Dieu auoit donné à nos vœux. C’estoit là le crime
qui deuoit couronner tous les autres, & n’en ayant
trouué aucun de plus horrible il a songé à celuy-là. Et
aussi iugez quelles ont esté les menées pour en venir à
bout. Il a despoüillé l’Estat d’autant de richesses qu’il
a pú, il a abatu le cœur des soldats ne leur fournissant
ny viures ny argent, il a reduit le peuple à vne pauureté