[retour à un affichage normal]

Mazarinade n° A_6_7

Image de la page

Anonyme [1649], MANVEL DV BON CITOYEN, OV BOVCLIER DE DEFENSE LEGITIME, Contre les assauts de l’Ennemy. , françaisRéférence RIM : M0_2406. Cote locale : A_6_7.

ny murmure ; il passa pour vne action de Iustice : Et nous sommes si
malheureux, & si traistres à nostre bonheur, que pour mille francs
qu’on aura imposez sur vne somme qui a plus de dorures qu’vne
Reyne de Saba, on verra des familles en rumeur, qui crient au meurtre,
& qui se scandalisent de cette rigueur ; & cependant ils ne firent
iamais de conscience de la ruine de plusieurs milliers d’hommes, qui
ont esté despoüillez par l’Exacteur qui a basty tous ces Palais, &
amassé vne montagne d’or. Il y a quelques années qu’vn homme assez
imaginatif nous surprit fort agreablement par vne vision qu’il nous
raconta : Il nous dist qu’il venoit de voir dans des chaudieres & des
marmites boüillantes des Elections toutes entieres ; il sortoit de
l’Eglise Nostre-Dame ; ie crû que c’estoit que dans la meditation
des quatre fins de l’homme il auoit eu quelque forte imagination des
peines d’Enfer : Il nous expliqua en fin sa figure, en nous disant, qu’il
venoit d’vne maison du Cloistre où l’on attendoit Monsieur Deffiat à
disner, & qu’il auoit veu des potages & des bisques de prix inestimable,
capables d’absorber les Generalitez de Touraine & de Berry.
C’est contre ce grand luxe que les gens de bien sont irritez, & contre
ceux qui l’entretiennent. Et si quelques Conseillers du Parlement de
Paris ont pris à tasche de vouloir mettre des bornes à ces grands excez ;
si le Garde des Seaux de Marillac y auoit trauaillé de son temps,
& si tous les Legislateurs ont eu esgard à ce desordre ; escoutera-t’on
des Bouffons de Cour & des Gourmands contre des intentions si
loüables ? Nest-ce pas vne impudence capitale de presenter à la Reyne
vne bouchée de pain, & luy faire à croire qu’elle vaut vne pistolle à
Paris. Et ces railleries sanglantes iointes à l’histoire de Charles sixiesme,
ne sont-elles pas damnables ? Messieurs du Parlement, Messieurs
les Princes, & tous vous autres bons Frãçois qui voulez la reformation
de l’Estat, & le soulagement du peuple ; ne deschargez pas toute vostre
indignation sur le Ministre Estranger : il n’en seroit iamais venu là, s’il
n’y auoit esté porte par la trahison de quatre ou cinq Domestiques,
qui luy ont donné des aduis, & luy ont declaré le foible du Maistre,
& de la Maistresse. Ainsi conseillerent-ils Conchine ; ainsi seruirent-ils
les Luines ; ainsi se prostituerent-ils au Cardinal de Richelieu ;
ainsi raillerent-ils la Reyne Mere, qu’ils auoient tant idolatrée. On
les cognoist, on sçait leurs malices, on en sent le prejudice, & on les
espargne. Permettez-nous au moins de les nommer, & d’en faire vn