[retour à un affichage normal]

Mazarinade n° B_11_20

Image de la page

Anonyme [1652], MANIFESTE DE LA VILLE DE PARIS, CONTRE LE RETOVR du Cardinal Mazarin. DEDIE A SON ALTESSE ROYALE. , français, latinRéférence RIM : M0_2362. Cote locale : B_11_20.

des peuples, & si on pourra tousiours trouuer
vn concours de toutes les Puissances de l’Estat pour
la deffense de Paris.
 
Ne sçait on pas l’addresse du Cardinal, qui est de
diuiser tout par des intrigues de Cour, & par vne infinité
d’artifices. Si nous le laissons prendre vne fois
racine, les esperances qu’il donnera aux vns & aux
autres seront encore plus fortes.
La guerre est donc necessaire, nous ne pouuons
trouuer de repos que dans la deffaite de nostre ennemy,
c’estoit la preface de Caton dans tous ses auis
dans le Senat Il nous faut, disoit il tousiours, destruire
Cartage, ou Cartage nous ruinera. Les momens
sont precieux dans cette sorte d’affaires. La
victoire depend du temps & de la promptitude de
l’execution : Opportunos magnis conatibus transitus rerum :
nec cunctatione opus, vbi perniciosior sit quies quam
temeritas. La guerre est donc concluë, elle est honneste,
elle est iuste, elle est absolument necessaire :
Il faut chercher les moyens de la soustenir.
Quoy qu’il s’agisse de nos vies, de nos biens, & de
nostre liberté, je ne pretends pas pourtant que nous
desboursions aucune chose ; nous auons assez d’autres
moyens qui sont iustes & legitimes pour deffaire
nos Ennemis.
Nous pouuons prendre premierement les deniers
publics. Cela est iuste. Les deniers publics
sont à nous. Ils ne sont donnez que pour la conseruation
de nous mesmes & de la societé Tellement
que quand il s’agit de nous conseruer, quand il s’agit