[retour à un affichage normal]

Mazarinade n° B_9_14

Image de la page

Anonyme [[s. d.]], FACTVM Pour Monsieur le Duc de Vandosme. Contre les Pretentions de Monsieur & Madame d’Elbeuf. , françaisRéférence RIM : M4_41. Cote locale : B_9_14.

la succession qui vient par ce moyen se peut dire
bien fait & gratification : Ainsi dans ces termes generaux,
Madame d’Elbeuf peut veritablement comprendre
la succession de Madame sa Mere, si elle a son consentement ;
& celuy de Messieurs d’Estrées, Monsieur
de Vandosme les a pour luy : & par actes si solemnels
& authentiques, qu’il faudroit renuerser toute la seureté
des Loix diuines & humaines, & prendre les
Arrests du Parlement pour illusions, si l’estat de sa Maison
fondé sur iceux n’estoit certain.
 
Les Lettres Patentes de legitimation accordées par
le Roy Henry le Grand, à Monsieur le Duc de Vandosme,
au mois de Ianuier 1595. donnent vn titre assez
puissant, puis qu’il est verifié dans le Parlement & la
Chambre des Comptes ; l’vn des principaux effets de la
legitimation, estoit de rendre Monsieur de Vandosme
habille de succeder à Madame sa Mere, le consentement
de laquelle estoit necessaire Le Roy pour l’inciter à le
donner d’autant plus volontiers que l’auantage seroit
reciproque, luy accorda par Lettres Patentes la garde-noble
de son Fils, auec le droict de luy pouuoir reciproquement
succeder. Ces Lettres ont esté verifiées au
Parlement, & en consequence d’icelles Madame la
Duchesse de Beaufort passa acte au Greffe du Parlement
du 26. Feurier 1596. portant son consentement
pour rendre Monsieur le Duc de Vandosme son fils
habille & capable de luy succeder.
Sur quel Titre plus specieux peut-on establir vne
qualité d’heritier presomptif ? en voicy neantmoins
encore vn qui semble plus fort.