[retour à un affichage normal]

Mazarinade n° A_4_2

Image de la page

Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.

& les mesmes calomnies, que si leurs ennemis estoient aussi
affectionnez au Prince & au bien public, que l’Estat ne pourroit
rien craindre ny au dedans ny au dehors, que l’on pourroit licentier
en asseurance les armées, & que la paix seroit bien-tost faite
par tout.
 
Oüy, mais dit-on, les moyens de faire l’assemblée ont esté extraordinaires,
l’on a affiché des Billets, on les a publiez dans les
Parroisses, c’est vn commancement de troubles, de desordres,
& de sedition.
Il paroist bien que ceux qui en iugent de la sorte, en parlent de
passion & d’interest. Ne sçait-on pas que la moindre perte qui se
fasse, on la fait tousjours crier dans les lieux publics, on la demande
aux Parroisses.
Mais ce qui a obligé les demandeurs à se seruir de ce moyen
pour faire leurs conferences, c’est qu’ils n’en pouuoient trouuer
d’autre qui leur fust vtile. Car comme les Rentes de l’Hostel de
Ville sont respanduës dans toutes les familles de Paris, qu’il y a
plus de cent mil personnes qui s’y treuuent interessées, il n’y
auoit point d’autres voyes pour les aduertir de veiller à la conseruation
de leur bien.
Les affaires où tant de personnes ont part, ne sont pas comme
les autres : elles ne se peuuent pas traitter par vn petit nombre.
Il faut que les resolutions soient prises en pleine assemblée,
autrement l’on ne manque pas d’entrer en des soubçons
& des deffiances. On peut bien choisir quelqu’vn pour l’execution,
mais il faut que l’ordre & la conduite soit generale ; c’est
à dire qu’elle ayt esté arrestée par tous les interessez.
Et de faict dans l’affaire mesme dont il s’agist, quelques soings
qu’ayent pris les demandeurs de se garentir des surprises, ne
sçait-on pas qu’ils n’ont pû empescher que leurs parties aduerses
n’en ayent gagné par argent, ou par d’autres artifices, qui faisoient
des sollicitations contraires, qui se disoient les veritables
Rentiers, & qui paroissoient par cette intrigue tres-satisfaits de
perdre toutes leurs rentes, & de ce qu’on auoit renuersé les
Arrests & la Declaration.
Et l’insolence des vns & des autres estoit venuë à vn tel point,
qu’encore que ce ne fussent pour la plus-part que des gens ramassez,