[retour à un affichage normal]

Mazarinade n° A_4_2

Image de la page

Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.

auoit pour lors le departement, luy fit mesme finir son bail
precedent plustost qu’il ne deuoit finir, parce qu’il contenoit
les conditions ordinaires, & qu’il s’estoit chargé de
payer les quatre quartiers.
 
Comme cela fut ainsi estably, alors les rentes furent en
proye aux Partisans, & à ceux qui les maintenoient. Car
par les estats l’on a fait tels retranchemens que l’on a voulu.
Les Preuosts des Marchands ne s’en sont point mis en
peine, ils n’ont point trauaillé pour conseruer, ny pour restablir
l’ancien ordre, qui estoit de faire comprendre dans
le bail ce qu’on deuoit payer des rentes, & en faire faire les
submissions, tant à l’Hostel de Ville, que dans les Compagnies
Souueraines.
Mais ils ont bien fait pis, ils ont mesme consenty volontairement
qu’on ait reformé les estats particuliers, & que
posterieurement, & apres trois années entieres, on les ait
changez pour trouuer lieu de faire des retranchemens notables,
que l’on peut dire auoir ruine les rentes, & les auoir
anneanties.
Ce fait n’est pas imaginaire, l’on sçait qu’en l’année 1637,
1638. & 1639. Le Roy auoit encore fait fonds dans les estats
de quatre quartiers pour les Aydes. Mais afin qu’on le pust
diuertir, l’on suprima les estats particuliers de ces trois années,
& l’on fit vn estat general en 1639. dans lequel l’on ne
fit fonds que pour deux années. Tellement que ce fut vne
année entiere de perduë.
Comme cela ne se pouuoit pas faire sans le consentement
du Preuost des Marchands, enuers lequel les fermiers s’estoient
obligez par les submissions qu’ils auoient faites. Il
ne fut pas difficile de l’obtenir, celuy qui sortoit pour lors
ne fit aucune resistance : Il n’en communiqua point aux
Rentiers, il n’exita point la Iustice des compagnies souueraine,
en fin il se rendit le maistre absolu d’vne affaire, qui
regardoit la meilleure partie des familles du Royaume.
Et ces estats particuliers qui doiuent seruir de conuiction
contre ceux qui ont ainsi abandonné la cause publique, ne
sont pas des pieces inuentées à plaisir, & pour faire aucune
iniure les demandeurs qui les ont veus en sçauent les dattes
& toutes les particularitez.