[retour à un affichage normal]

Mazarinade n° C_3_2

Image de la page

Anonyme [1649], LETTRE DV ROY HENRY IV. en Bronze, du Pont neuf, A SON FILS LOVIS XIII. de la Place Royale. , françaisRéférence RIM : M0_2194. Cote locale : C_3_2.

de beaucoup de Finances arriuée de son temps,
non pourtant pas faite hors de France, & que si elle en
a apauury vne partie, ç’a esté en mesme temps pour
enrichir l’autre. Les bruits qui ont couru du mauuais
gouuernement qu’a prattiqué le Cardinal Mazarin
depuis quelques années, me fait parler de la façon, &
ie vous iure que i’ay de tres-grands doutes sur luy, apprenez-moy
si mes soupçons s’accordent auec la verité,
& si ie suis bon prophete, lors qu’il passe chez moy
pour l’autheur des disgraces presentes. Ie fais ce iugement
consequemment à celuy que i’ay conceu de son
ministere, dont les perfides desseins ont pour but l’extrême
misere du Peuple, la ruine de la Noblesse, l’abbaissement
des Magistrats, à la honte eternelle des
Princes qui le souffrent. Sicilien, subjet de l’Espagnol,
& Ministre d’Estat en France, ie le crois pour moy assez
meschant pour luy imputer tous les mal-heurs qui
nous peuuent trauerser pendant qu’il fera sejour dans
nos Estats, & ie souhaitterois qu’il fust pour iamais
purgé de pareils monstres. Il me fasche de ce que ie
suis en vn lieu où la relation des euenemens ne passe
iusques à moy que par la bouche des derniers des
hommes, & que i’en sois instruit par la canaille, car
ainsi ie demeure long-temps en peine deuant que sçauoir
la verité de ce qui se passe ; iusques icy on ne m’a
pas veu rechercher auec empressement des nouuelles,
aussi n’en ay-ie iamais attendu de si extraordinaires :
Vous estes dans le plus beau quartier de Paris, & ie suis
asseuré que tant de personnes de condition qui sont
vos voisins, n’y en debitent que de tres-asseurées ; ie