[retour à un affichage normal]

Mazarinade n° A_5_33

Image de la page

Anonyme [1649], LETTRE DESCHIFREE, Contenant plusieurs aduis qu’vn des Emissaires & Espions de Iules Mazarin luy donnoit de ce qui s’est passé icy depuis le 21. du mois de Fevrier mil six cens quarante-neuf. Auec l’ordre des chifres qui se peuuent lire aussi facilement que les lettres communes. , françaisRéférence RIM : M0_2066. Cote locale : A_5_33.

Et neantmoins il se rencontre des François
assez desnaturez pour se seruir d’vn crime si enorme,
aux despens de leur patrie, & pour tascher de
mettre leurs Compatriots entre les mains de
leurs ennemis. Et parce que, sont d’ordinaire
ceux qui paroissent auoir quelque affection pour
vn party qui le trahissent, & qui couurent d’vn
beau-semblant leur supercherie, il est d’autant
plus difficile de s’en apperceuoir, si la diuine Prouidence
soustenant la Iustice & la cause des innocens,
ne faisoit descouurir tous ces lasches artifices,
quoy que tres-cachez, ou du moins, n’en
empeschoit le pernicieux effet. C’est vne verité
qui se fait voir plus claire que le jour dans le Recit
que j’entreprens. Hier vingt-quatriéme de
Fevrier, reuenant de la Messe, je rencontray à mes
pieds, assez proche d’vne maison considerable,
& tout joignant la grande porte, vne lettre pliée
& cachetée d’vn meschant cachet, & sans inscription.
Conduit par vn bon Genie, je la releuay
de terre ; & l’ayant ouuerte, je la trouuay
remplie de chifres tels que je les ay escrits cy-apres,
à la difference qu’il falloit commencer à
lire par le dernier mot. Et ainsi en retrogradant,
je I’ay mis dedans vn autre ordre, pour faciliter
ceux qui la liront.