[retour à un affichage normal]

Mazarinade n° B_16_48

Image de la page

Anonyme [1652], LES VOYES DE LA PAIX. , français, latinRéférence RIM : M0_4052. Cote locale : B_16_48.

s’il y en auoit, qui est vn vray paradoxe que l’on colore
des pretenduës oppositions formées par Monsieur
le Prince, lors des deliberations faites pour l’execution
de la teste à prix & du fonds des cinquante
mil escus ; à quoy il y a si peu d’apparence, & Monsieur
le Prince a eu si peu de pouuoir que la vente des
meubles du Cardinal longuement discontinuée a
esté paracheuée, malgré toutes ses trauerses, s’il y eust
contribué, & celles du Cardinal qui souuent & faussement
a employé pour ce sujet l’authorité du Roy
par diuerses Lettres de cachet qu’il a fabriquées.
 
Vous deuiez dire encore, pour n’obmettre aucune
imposture qui pust nuire, ou du moins donner quelque
legere atteinte à la reputation de Monsieur le
Prince, qu’il est cause du schisme du Parlement, qui
est vne playe dangereuse, & qui saignera longtemps,
& qu’il a baillé au Cardinal le Conseil de sa
Translation à Pontoise, afin de concerter les moyens
de sa sortie & de son retour. Bref que son absence
& son éloignement a esté conuenu auec Monsieur le
Prince, & qu’il n’a exposé tant de fois sa vie en des
perils tres-apparens, & ne l’expose encores à present
que pour faciliter le retour du Cardinal & luy applanir
les chemins, sous les pretextes d’vne fortune
incertaine, & des liaisons auec vn homme qui fait
gloire de tromper tout le monde, & auec lequel vous
auoüez ailleurs qu’il est impossible qu’il trouue sa
seureté, & seroit tres-imprudent apres les choses
passées de prendre aucune confiance, & tres-preiudiciable