Mazarinade n° A_6_74
Image de la page
Anonyme [1649], LES PRESSANTES EXORTATIONS DE L’EVROPE, AVX QVATRES MONARCHIES Chrestiennes, & autres Etats de son Empire, pour la paix vniuerselle, & l’vnion de leurs armes, pour la destruction de l’Empire Ottoman. , françaisRéférence RIM : M0_2863. Cote locale : A_6_74.
que cela, ie voye aussi contracter vne vnion
indissoluble, entre la méme France, & l’Espagne,
que le Dannemarc soit bien d’accord
auec la Suede, & que la Pologne soit dessasuiettie
des incursions que luy font iournellement
les vassaux, & les Partisans du Grand
Seigneur. Pour l’Angleterre, ie la separe des
Royaumes de ma domination, comme étant
vne infame parricide, de son Roy legitime, &
la laisse en horreur, & en execration à la postesterité,
attendant que Dieu par vne iuste vengeance,
excite l’Ecosse, & l’Irlande à la chastier
seuerement comme elle merite.
O vous grande Reine, la plus puissante, &
la plus absoluë Monarchie de la Chrestienté,
qui ne releuez que de Dieu, Fille Aisnée de
l’Eglise, de qui la vertu, & la pieté, iointes à la
valleur de vos peuples, se sont faits, & se font
encore plus que iamais, admirer & redouter
de toute la terre. Pour tout dire, chere France,
la gloire des Princesses, & l’honneur des
Royaumes, voicy l’Europe qui vous conjure,
par tout ce qui vous est de plus cher au monde,
de vous accorder à ses vœux, de trauailler
auec elle à l’eternel repos de la Chrestienté, &
non seulement de faire vne paix ferme, & stable
auec l’Espagne, qui vous est alliée en tant
de façons, qu’il semble n’y auoir rien plus facile
Image de la page