[retour à un affichage normal]

Mazarinade n° C_6_39

Image de la page

Anonyme [1649], LES INSIGNES OBLIGATIONS QVE LES ROYS DE FRANCE ET LEVRS COVRONNES ONT TOVSIOVRS EV AV PARLEMENT DE PARIS. , françaisRéférence RIM : M0_1705. Cote locale : C_6_39.

enuoyées de Rome, qui portoient excommunication
contre Henry Roy de Nauarre, & Henry
Prince de Condé ; protesta que le Pape n’auoit aucun
pouuoir sur les Princes de France, & que lesdites
Bulles ne pouuoient causer que de tres-grands
desordres & d’estrãges animositez. Lors que le Roy
fut sorty de Paris pour la crainte des Guisars & des
Ligueurs, le Parlement ne fut-il pas le supplier instamment
qu’il eut à retourner en sa bonne ville de
Paris ? Que sa Majesté ne deuoit pas s’éloigner d’vn
peuple qui l’affectionnoit tres-particulierement, &
qu’elle y seroit plus honoreé & respectée que iamais.
Que n’a point fait cet Auguste Senat du temps
d’Henry IV. le plus vaillant, le plus genereux, le
plus aymable, comme le plus aymé Prince du monde :
Ce Monarque ayant esté éleué dans vne religion
qu’il auoit appris de ses Ancestres & succé auec le
laict, les ennemis de son Estat & du repos publique
prirent de là occasion de luy faire la guerre & former
des ligues contre sa Majesté ; Pour mieux ioüer
leur jeu, ils ioignirent de leur party le Pape Gregoire
XIV. & le soliciterent tant, qu’il fulmina excommunication
contre ceux qui estoient ses plus fidels
seruiteurs. Solicité à cela par les Partisans d’Espagne,
qui fauorisoient le party des Ligueurs. Mais le Parlement
fit deux actions tres-genereuses & loüables
à iamais : La premiere, fut de ne pas écouter les propositions
des Partisans du Roy Catholique ; & la
seconde, de casser les Bulles de sa Saincteté. Mais ce
qui est plus à remarquer, c’est que le Roy estant sorty