Mazarinade n° C_7_64
Image de la page
Anonyme [1649], LES EFFETS ADMIRABLES DE LA PROVIDENCE DE DIEV SVR LA VILLE DE PARIS ; OV REFLEXIONS DVN THEOLOGIEN enuoyées à vn sien amy solitaire sur les affaires du temps present. , français, latinRéférence RIM : M0_1199. Cote locale : C_7_64.
Sur le poinct qu’on nous enleua le Roy, on enuoya vne
lettre de cachet adressante au Preuost des Marchands & Escheuins
de la ville de Paris, par laquelle le Roy declare que
ce n’est point au Bourgeois & Habitant de sa bonne ville
qu’il en veut, mais à quelques-vns du Parlement, qu’il dit
estre des factieux, ennemis de son Estat, auoir l’intelligence
auec l’Estranger, & conspirer contre sa personne : d’abord
les moins clair-voyans s’apperceurent bien que s’estoit
vn artifice tendant à la diuision, & à destacher le corps de la
ville, d’auec celuy du Parlement. Cette Declaration ne
produisant pas son effet : En voicy arriuer vne autre de sainct
Germain comme par vn nouueau renfort, plus foudroyante
que la precedente, qui casse, supprime le Parlement, les declare
criminels de léze Maiesté, ennemis de l’Estat, perturbateurs
du repos public. Par la mesme Declaration le Roy
proteste n’imputer point au bourgeois, la reuolte de Paris
(c’est ainsi qu’ils le font parler) estre prest à les receuoir en
grace, estre quantité de demonstrations, de bien-vueillance,
promet oubly du passé, & abolition generale de toutes les
fautes. Mais comme cette vnion du peuple auec le Parlement
est vn œuvre de Dieu, qu’il est écrit, que, Quod Deus
coniunxit homo non separet, aussi arriue-il, que tous les artifices
des hommes ne la peuuent rompre. Ces attraits de douceur
& clemence, ne pouuant produire l’effet pretendu, l’on
fait iouër vne autre piece de batterie. Voicy des visages effrayans
qui ne portent que terreurs & menaces, se presenter
aux enuirons de Paris, c’est à dire, des Herauts d’armes, gens
qui par la nature de leurs charges, ne sont porteurs que de
Declarations de guerre, & sont les truchemens de la colere
& de la plus grande indignation des Roys. En mesme temps
voila paroistre dans la ville, le Cheualier de la Valette porteur
d’vne mauuaise graine que l’on appelle zizanie, c’est à
dire, des placards & libelles extremement seditieux, qu’il seme
& repand par toute la ville : Adioustez à cela tant d’autres
boute-feux secrets, tant de traistres & espions de la Cour
desquels Paris est tout plein, tant de libertins & mauuais
Image de la page